شارلي شابلن و السفر عبر الزمن
الظاهر أن العم شارلي القصير القامة الخفيف الدم ، المتشرد المطحون دائما لا يموت ، فبالرغم من مرور 33 سنة على وفاته ، فجأة ظهرت خلال اليومين اللي فاتوا مقطع من فيلم دعائي عمله شارلي في بداية حياته لسيرك في مدينة نيويورك ، اللقطة مدتها دقيقة بتظهر فيها سيدة بتتكلم كأن معاها تليفون محمول ، شيء غريب و بدأت وكالات الأنباء و الصحف تنقل الخبر النهاردة قلت أبص على المقطع بصراحة فعلا الموضوع غريب ، و خلاني أتسائل زيهم يا ترى العم شارلي سافر عبر الزمن و جاب تليفون و صوره في الفيلم بتاعه قبل اختراع الموبايل بأكثر من 30 سنة و الا التليفون المحمول اختراع قديم و احنا اللي كنا نايمين على ودانا ، يخرب بيتك يا شارلي هتفضل دايما عامل مشاكل حتى و انت مش معانا. المهم الخبر الطريف ده ياخدنا لموضوع تاني برده خاص بالسينما ، زمان لغاية الثمانينات كان الواحد بيستنى افلام مخرجين بالاسم زى عاطف الطيب ، محمد خان ، يوسف شاهين ، داود عبد السيد ، يا ترى في حد يفتكر أسم مخرج واحد من مخرجين اليومين دول .... أشك !