صدق أو متصدقش ... مش هتفرق !
النهاردة أجازة ، و أخدت قرار من الصبح مافيش أنترنيت ، و فعلا عملت شوية زيارات عائلية ، و نزلت القهوة ، لكن القعدة كانت مملة الكلام بيتعاد كل أسبوع ، في الآخر قررت اقطع سهرة الملل و اروح على البيت ، فتحت التلفزيون ، اقلب بين القنوات بلا هدف محدد ، جبت الجزيرة ما فيهاش غير موضوع السودان ، العربية جايبين واحد دقنه واصلة لغاية ركبته و مش فاهم منه حاجة ، البي بي سي بيتكلموا عن الحكومة الأمريكية و الإنتخابات النصفية للكونجرس و موقف أوباما ... ماشي بس لقيت الكلام مش اللي هوه بيلفوا و يدوروا من غير رأي واضح.
المهم قفلت التلفزيون و قررت أفتح الكمبيوتر ، كان بقالي كثير مسمعتش حاجة عن حزب التجمع قلت يا واد خدلك بصه على الجرنان بتاعه ، و هوبا ضرب الدم في عروقي عنوان مستفز في الصفحة الأولى أحتياجات 20 ملعب جولف من المياه توازي أحتياجات 180 ألف مصري ، ياريت الموضوع على قد كده ، ده تكلفة ملعب الجولف الواحد 150 مليون جنيه !!! ، و علشان تلعبلك جيم واحد بتدفع 60 دولار ، أصل الملاعب دي مبتعترفش بالجنيه المصري اللي هو اساسا مبقاش ليه قيمة لدرجة انه بقى عامل زي البريزة بتاعة زمان حتة نيكل هابلة يعني الجنيه بتاع النهاردة يساوي بريزة يعني عشرة صاغ.
180 ألف مصري محرومين من المياه النقية علشان كام ميت واحد يتسلوا و يلعبوا لعبة غبية كل اللي عليك أنك تنزل الكورة البيضة في حفرة في أقل عدد من الضربات ، المهم روحت فاتح التليفون و كلمت واحد صاحبي أنا عارف انه عنده خلفية بالحاجات دي ... معلش اصلي ماليش في موضوع الجولف ده ، أعرف منه ثمن مضارب الجولف كام ، الراجل ضحك قوي و قالي أيه عايز تشتري ، قتلله لأ بس عايز آخد فكرة يعني ، قالي مش غالية ثمن مضارب الجولف بالشنطة بتاعتها بيبدأ من 15.000 جنيه ده غير ثمن الكور اللي بيتراوح ثمنها ما بين 75 و 150 جنيه.
صدق أو متصدقش بلد بتعاني من البطالة و زيادة نسبة الفقر فيها 20 ملعب جولف تكلفتهم 300.000.0000 مليون جنيه
صدق أو متصدقش بلد 60% من الشباب فيها مش لاقي شغل بيستورد أيس كريم و كفيار بـ 4 مليار جنيه
صدق أو متصدقش بلد نسبة اللي تحت خط الفقر وصل لـ 40% من إجمالي الشعب وصل حجم أنفاقهم على أجهزة المحمول فقط 5 مليار جنيه
صدق أو متصدقش بتستورد فياجرا بسبعة مليار جنيه
صدق أو متصدقش حجم الأموال اللي بتدور في عالم كرة القدم وصلت 12 مليار جنيه
صدق أو متصدقش أن حجم الفلوس اللي كتبتها في التدوينة دي تشغل 4 مليون عاطل
و كل سنة و أنتم بخير بمناسبة حلول فصل الشتاء
ازيك ياعمرو.. صراحة حاجة تحرق الدم وتستفز اي حديستوعبهاالحكومة بتستغل جهل الناس وخوفهم وسكوتهم وبتاخدفلوسهمتعمل بيهاالعاب جولف وحمامات سباحةونسيت تقول علي الوزراوالنواب بتوع العلاج وعالناس اللي بتموت عشان مش لاقيةتمن ازازة دوا ..نسيت تقول عالناس اللي نايمين تحت الكباري وبردالشتامش هيرحمهم ومفيش ستروع الذوات اللي نايمين في قصور وفلل
ردحذفتحياتي ليك
السلام عليكم ورحمة الله وبركاته
ردحذفهذه مهزلة تضاف إلى جملة المهاول والتناقضات والأشياء الكثيرة التى لا نفهمها فى مصر .. الشعب المصرى دلوقت صنفين لا ثالث لهما .. صنف يأكل من صناديق القمامة ويصاب بالفشل الكلوى والسرطان و صنف آخر مشكلته فى وجود ملعب جولف عشان يروق دمه...وطالما من يأكل من القمامة راضى وساكت واللى معاه مليارات مافيش حد بيحاسبه .. إذا يبقى الوضع على ماهو عليه..
مجرد سؤال خبيث.. ما علاقة لحية الرجل وهى سنة نبويه يجب أن تحترم ما علاقة هذه اللحية بما يقول ؟
عادي....لما حكومة تنزل على شعب بالباراشوت من غير لا انتخابات ولا حتى محاسبة...يبقى لازم تروق نفسها وتخلي حمادة يلعب ...تخيل واحد راجل اعمال غني وشاف الجزيرة ولقى خبرين واحد عن الميه وواحد عن الجولف ح يشوف ميين؟ انت نفسك قلبت السودان والراجل ابو دقن متريين...بس كان في ناس قاعدة ومشدودة للاتنين اكيد ولعلمك انا شفت ابو دقن عشان المصرية كانت جايبة اليسا فقلبتها ...وحياة ربنا تلاقي كان في ملايين بيتفرجو عليها او بيتفرجو عليها وعلى ستاتهم في نفس الوقت وبيلعنو اليوم اللي اتجووزو فيه هههههه...بس نسين حاجة انهم مش لاقيين ياكلو ولو كانو بس فكرو انهم كانو بيلعبو جولف كانو ممكن شافو موزة هناك...شفت بقى فايدة الجولف؟
ردحذفأفروديت الجميلة حمد الله على السلامة عاش من شافك ... أختفيتي فجأة ... لكن كويس الواحد أطمن عليكي
ردحذفأقولك أيه دي حكومة البيزنس و للأسف أحنا السبب سايبينهم في مجلس الشعب يحطوا القوانين اللي على مزاجهم و بيحطوا قوانين علشان مصلحتهم مش مصلحة الناس ، لكن أقول أيه أحنا السبب سايبينهم يمصوا في دمنا و بنضحك
أهلا "أنا حرة"
ردحذففي البداية رد مش خبيث
أنا مش بتريق على الشيخ و ما تخديش الأمور بحساسية زيادة لكن فعلا مفهمتش منه حاجة فزهقت.
أما بقى عن المهازل اللي أحنا فيها هرجع و اقول أحنا السبب طالما أننا سايبين اللي بيلعبواالجولف بيروشوا الملاعب بتاعتهم بكرامتنا و حقوقنا
تراكيب بقول أيه ... بلاش سيرة أليسا أحسن الحكومة المحلية بتقرى المدونة و خلينا حلويين ، أما عن موضوع السودان و عمنا الشيخ الكلام متكرر مافيش جديد الجنوب هينفصل عن الشمال ، و عمنا الشيخ ماليش دعوة بيه ده حماية ملكية المدونة عندي محجوبة في السعودية و سوريا و السودان تصدق هههههه يعني لا عاجب اليمين و لا الشمال
ردحذفكل سنة و انت طيب