مسلسل The Office حالة من الهستريا الكوميدية

النهاردة عايز أتكلم على مسلسل the office ، رغم اني مش من هواة المسلسلات و ما عنديش صبر أني أتابعها لكن بترشيح من صديق قالي أتفرج على المسلسل ده و أداني أسطوانة عليها الموسم الأول بالكامل هو عبارة عن 6 حلقات ، المهم فضلت عندي الأسطوانة حوالي شهر و انا مش مهتم أني أتفرج عليها ، لغاية لما أتصل بيا علشان شغل بنحضره مع بعض و خدنا الحديث للمسلسل بصراحة اتكسفت منه جدا و أنا بكلمه و اعتذرت ليه أني كنت مشغول و ماجتش فرصة أني أتفرج عليه ، المهم ألح أني أتفرج و أقوله رأي ... و فعلا بسبب البرد الواحد بقى يكن شوية في البيت و قلت فرصة أتفرج على المسلسل و أشوف حكايته أيه ...

The Office في البداية استغربت من طريقة الإخراج و التناول و تركيبة الشخصيات اللي مش ممكن تتجمع في مكان واحد ، ، ممكن نقول أن المسلسل تركيبة ما بين الأفلام التسجيلية و برامج تلفزيون الواقع و الست كوم ، خليط غريب بس عبقري ...

بعد ما أتفرجت دخلت على النت أقرى المكتوب عن المسلسل و اشوف تقيم الناس عليه ايه ، كعادتي دايما اول حاجة بمر عليها كان موقع IMDB فوجئت بالتقييم العالي اللي واخده المسلسل 9.3/10 ، و عدد المصوتين عليه تعدي الـ 53 ألف شخص ، حاجة كده عاملة زي فيلم The Shawshank Redemptionمع الإختلاف طبعا ...

من الحاجات اللي فاجأتني أن المسلسل هو نسخة امريكية لأصل انجليزي من إنتاج الـ BBC ، لما حقق نجاح كبير في بريطانيا أتعاقدت قناة NBC الأمريكية علشان تعمل نسخة منه أمريكية و ده مش معتاد عادة بيكون العكس لكن المرة دي المعتاد أتقلب ، انا متفرجتش لسه على النسخة الانجليزي لكن هتفرج عليها بس خلينا مع النسخة الأمريكاني لأني شوفت لغاية دلوقتي اربع مواسم ...

أبطال العمل

ستيف كارل

Steve Carellهو البطل الرئيسي للمسلسل يلعب دور "مايكل سكوت" المدير الإقليمي لإحدى شركات تسويق الورق ،  شخصية طيبة لكن لا يمكن تتصور أنه ممكن يكون مدير لفرع فهو عبارة عن طفل في جسم رجل كبير تعدى منتصف الأربعين من عمره ، بيتصرف بشكل هستيري بيعشق المقالب و القاء النكات اللي بيعتبرها من وجهة نظره أن دمها خفيف لكن هي في الحقيقة سمجة ، تصرفاته مع الموظفين في غاية الغرابة حول مقر العمل تقريبا لصالة حفلات ، في كل حلقة لازم يعمل حفلة لأي سبب كان ، يدخل في علاقة مع رئيسته في العمل ، و طبعا بسبب العلاقة الغريبة دي و التناقض الحاد بين شخصيته الهزلية و شخصيتها الجادة بيحصل العديد من المواقف الكوميدية لكن علاقتهم بتستمر على مدار الأجزاء اللي شوفتها رغم المواقف المحرجة اللي بيسببها ليها

جينا فيشر

Jenna Fischer بتلعب دور "بام بيسلي" ، تحس أنها حتة الفراولة بتاعة المسلسل بشخصيتها الجميلة الطيبة الرومانسية ، و براءة و جهها ، و تحملها سخافات المدير ، تعمل كموظفة استقبال ، مخطوبة لزميلها في العمل روي أندرسون وهو بيعمل في مخازن الشركة ، إلا أنها تعجب بموظف آخر هو جيم هالبرت موظف المبيعات ، تعيش حالة من الحيرة بينهم فهي منذ البداية مرتبطة بـ روي قبل أن تتعرف على جيم و طبعا بيحصل عدد من المواقف الكوميدية و صراع صامت بين جيم و روي حتى يحسم في نهاية الأمر ...

ريان ويلسون

Rainn Wilson بيلعب دور "دويت شرويت" ، شخصية غريبة تعشق الشخصيات الخيالية في أفلام السينما زي شخصيات حرب الفضاء ، طيب القلب جدا لكنه ، يتملق رئيسه في العمل مايكل طوال الوقت ، شخصية هستيرية أخرى ، على مدار الحلقات يقع في مشاكل من زميله في العمل جيم اللي دايما بيعمل فيه مقالب في غاية الغرابة ، منها على سبيل المثال لما أتفق جيم مع بام على أنهم يوهموه عن طريق إرسال رسائل له أن المخابرات الأمريكية رشحته للعمل في مهمة خاصة و طبعا لازم من الكتمان ، و مع شخصية بتعيش مع أبطال السينما بالشكل الكاريكاتيري ده صدق دويت ، و طبعا حصل مجموعة من المواقف الغير طبيعية ...

جون كرينسكي

John Krasinski

موظف المبيعات "جيم هالبرت" ، يشعر بإنجذاب ناحية زميلته بالعمل بام ، لكن للأسف الشديد يكتشف أنها مخطوبة لزميل آخر ، يكتفي جيم بأن تكون بام اكثر المقربين له في المكتب ، يعشق مشاكسة زميله "دويت شرويت" ، على مدار الحلقات تشعر أنه منجذب لبام و أن بام منجذبة له لكن الظروف لا تساعدهم على أن كل واحد منهم يقول اللي جواه ، يمكن من أكثر العلاقات اللي ممكن تشدك علشان تتفرج على المسلسل علشان تعرف هتوصل لغاية فين ...

بي جي نوفاك

B.J. Novak

الموظف تحت التمرين أسمه في المسلسل "ريان هوارد" ، شخصية تشعر أنها متزنة مستاء من مديره مايكل و أفعاله الغريبة لكنه يتعايش معها ، فهو لا يزال تحت التمرين ...

نوفاك كتب بنفسه الموسم الأول بالكامل و عدد كبير من حلقات باق الأجزاء و أخرج عدد آخر منها ، المهم اللي هيتفرج على المسلسل هيكتشف أن شخصية "ريان هوارد" هتتسبب في تغيرات كثيرة في المكتب

ميلورا هاردين

Melora Hardin

هي "جان ليفنسون" رئيسة المدير "مايكل سكوت" ، تدخل معه في علاقة عاطفية قوية ، تحاول الهروب من علاقتها بمايكل اللي كانت بتشوف أنه شخصية تافهة و لا يمكن ترتبط بشخص مثله ، لكنها تكتشف رغم تفاهته قدر يعمل صفقات غير عادية للمكتب من خلال أسلوبه الهستيري الغير معتاد ، فتعجب به و ترتبط معه في علاقة تصبح حديث الموظفين ...

دول الشخصيات الرئيسية تقريبا ، لكن اللي هيتفرج على الحلقات هيكتشف أنه فجأة هيرتبط بكل العاملين في المكتب و حكايتهم الطريفة الكاريكاتيرية ...

آه قبل ما أنسى .... مبروك لكل الزملكاوية و هارد لك يا أهلاوية Tozz تعيشوا و تاخدوا غيرها

تعليقات

المشاركات الشائعة من هذه المدونة

و رحل مفكر آخر “نصر حامد أبو زيد“

تنظيم القاعدة بيقتل 37 مسيحي عراقي علشان كامليا المصرية !!

الرأسمالية : قصة حب !