شوية أفكار خبيثة زي الفيروسات الخبيثة !
كنت اخدت فترة هدنة من التدوين ، لان المسألة بقت تغم النفس ، نفسي أكتب حاجة مفرحة ، مش لاقي ، كل اللي شايفه قدامي خلافات و تفاهات و صراع على أوهام ، و كله بيتاجر بكله ، من كام يوم قابلت صديق ليا على القهوة كان بقاله فترة عامل غياب و مش بيظهر ، استقبلناه كالعادة و بدأت النميمة اليومية عن اللي بيحصل في البلد ، بصراحة محدش في الشلة متفائل ، كله بيقول الثورة خلصت خلاص قبل ما تتحقق مطالبها الحقيقية ، دستور أيه و انتخابات أيه الأول شوفوا الناس عايزة ايه !
المهم سيبكم من الكلام اللي مش هيودي و لا يجيب لان الوضع دلوقتي بقى مختلف عن فترة الثورة الحقيقية
النهاردة السيد أوباما و السيدة مريكيل أتفقوا على أن موضوع القضية الفلسطينية مش عايزينه يدخل الأمم المتحدة لان كده الوضع هيتغير ، الخبر ده خلاني أبص لحاجات تانية كثير بتحصل حوالينا ...
من أمتى أمريكا بتحب الثورات الشعبية أو هي بتدعم أي ثورة شعبية ، و يكون عندها استعداد تحارب علشانها ، الموقف في ليبيا مش حلو ... عذرا يا ثوار ليبيا بلدكم بتتباع دلوقتي في المزاد !
تونس من ثورة شعبية لخناقة على ماهية الدولة !!
سوريا ثورة شعبية و دلوقتي بقت طائفية !!
اليمن ثورة شعبية و دلوقتي بقت قبائلية !!
البحرين ... مطالب ديمقراطية و دلوقتي شيعية !!
أما في مصر كانت ثورة شعبية و دلوقتي بقت ........... مش عارف !!
واحد ... أثنين .... الثورة راحت فين !
والله الوضع بقى مظلم قوي ،، الواحد عنده اكتئاب مش طبيعي بسبب الاحداث اللي بتحصل ، كنا فاكرين انه الدنيا راح يبقى لونها بمبي خالص .. لكن بتهيألي انها تحولت من اللون الرمادي إلى الاسود ..
ردحذفربنا يعدي هاالايام على خير .. في كل دولنا العربية ..
ويبعد عنا وعنكم الشر امين يارب العالمين
الاكتئاب اليومين دول سره باتع
ردحذفربنا يستر على الأيام اللي جاية !!!
الإكتئاب دا عند كل حد عارف احنا وصلنا لإيه
ردحذفالمهم بقي اننا هنفضل فى اكتئابنا و نسيبهالهم ؟؟
مش عارفه ممكن نعمل ايه .. بس اللى عارفاه اننا لاااااازم نعمل حاجه
الثورة فين سؤالك صح يا عمرو بجد حاجة تجيب أكتئاب كلنا كنا حاسين أن فعلا هيحصل تغير لكن واضح انه هيبقى تغير للاسوء المجلس العسكري بصراحة مش مريح و الاخوان كذابين و ملاوعين الليبراليين بيدافعوا عن مصالحهم اليسار صوتهم عالي قوي في الندوات و الخطب بس ناقص الناس الغلبانة اللي زينا نعمل ايه !!!
ردحذفأهلا مها
ردحذفالأكتئاب أعتقد أنه شىء طبيعي الفترة دي لكن مش هنسيبهم ... أنا مش من عادتي الاستسلام بس لازم وقفة صغيرة علشان نفهم أيه اللي بيحصل ... بس لغاية دلوقتي الحل أن الصورة محتاجة ثورة عليها و بسرعة لأن لو سكتنا أكثر من كده هتموت
ازيك يا رشا
ردحذفالثورة تايهة المشكلة أننا كنا حاطين آمال كبيرة قوي لكن فجأة الأمال دي بدأت تختفي و ده اللي نتج عنه حالة أكتئاب بس لسه ما يأسناش
مصر هترجع أحسن من الأول انشاء الله
ردحذف