14 يناير، 2011

يا حرقة دمك يا مصر

 

 

revolution

مين فيكي يا بلد مش محروق دمه ، مين فيكي يا بلد مش بيسب و يلعن كل يوم الصبح وهو بيشوف الاسعار عمالة تطلع لغاية لما بقت فوق طاقت الأحتمال ، حد يصدق في بلد بيمر فيها نهر بطولها كله يكون فيها اسعار الخضار بالشكل ده ، حقيقي مجنونة يا قوطة خلاص هتبقى بـ 15 جنيه قريب حد يصدق يا ناس اشتري كيلو قوطة بـ 15 جنيه ليــــــه .... حرررررررررام ... و الله حرررررررررام

اللحمة خلاص هنشتريها بالدولار لان الجنيه مابقاش ينفع ، السمك و عندنا البحر الاحمر و البحر المتوسط و نهر النيل و بحيرة ناصر و السمك بالسعر ده ، لا و كمان بنستورد ... حد يصدق أننا كنا في أواخر الثمانينات كان كيلو السمك الفيليه اللي بيجي من بحيرة ناصر ما يعديش 3 جنيه شوفو النهارده سعره كام ، وسمعت أنه قبل كده كان بيتباع في المجمعات بـ 65 قرش و كانت شركة الأسماك الحكومية بتكسب فيه ...

طبعا علشان خاطر المحتكرين و المستوردين تم تدمير أسطول الصيد في البحيرة علشانهم ، و أحنا نجوع ، مافيش حل غير ثورة جديدة تغير النظام الفاشل ... ثورة شعب حقيقية ... و الله العظيم حاسس أنها قربت ... الثورة هتحصل غصب عن التخين و الناس خلاص مش قادرة تستحمل

ثورة … ثورة حتى النصـــر