20 نوفمبر، 2010

يا بلد نكتة يا شعب أبن نكتة !

آخر يوم في العيـد كان لازم يقفل بابتسامة ، أتلمت شلة الفقر لأول مرة مجتمعة من سنين ، اللي كان مسافر رجع في أجازة العيد و اللي موجود في مصر أنتهز الفرصة بعد ما خلص كل واجبات العيد من زيارات عائلية و خلافه لنجتمع على القهوة اللي شافت أحلى سنين عمرنا من ايام ثانوي ...

الظاهر أن لمتنا دي قلبت على كوميديا لمت علينا القهوة كلها بدأت من صديق الدراسة القديم "اشرف" ، بالرغم أنه يعمل في مجال الإليكترونيات و بقى في منصب كبير لكن زي ما هو من أيام الصعلكة هوايته السخرية و النكتة و بيحول أي قعدة أو مناقشة لحالة من هستريا الضحك ...

البداية كانت نقاش عن الانتخابات و قعدنا نتناقش على فرص المرشحين عندنا في الدايرة اللي بقينا مش عارفين أولها من آخرها بعد ما بقى حي المعادي ضمن محافظة حلوان يعني بقينا من الأقاليم مش من العاصمة ... المهم النقاش فجأة قلب بتهريج على الموضوع ده و صديقنا العزيز "أشرف " أنتهز الفرصة و هاتك يا نكت كلها نكت تودي في داهية هحاول أفتكر شوية منها ...

Smile

اوباما اتصل بمبارك قاله ابعتلي ناس من عندك عشان الانتخابات عندي صعبة السنة دي ، مبارك قاله من عينيه و بعتلة كتيبة من الحزب الوطني ، اسبوع و اوباما اتصل بيه و قاله "الله يخرب بيتك" و قفل , شوية و هيلاري اتصلت و قالت "الله يخرب بيتك"، و قفلت ، مبارك قال في ايه افتحوا التليفزيون... لقى المذيع بيقول : أسفرت انتخابات الكونجرس الأمريكي على أغرب النتائج في تاريخ الولايات المتحدة الأمريكية بفوز الرئيس المصري حسني مبارك بنسبة %99.9

النكتة الثانية

واحد شغال فى فرز اللجان الانتخابية...فواحد صاحبه بيسأله : بقى معقول انتوا بتقعدوا تفرزوا الأصوات دى كلها !

قال له : و لا بنفرز و لا حاجة... التعليمات واضحة وصريحة... احنا بنرمى الورقة بتاعة الناخب فى الهوا ... لو نزلت على وشها أو ضهرها يبقى وطنى ...و لو على سنها يبقى معارض !

نكتة كمان

مدرس في مدرسة ابتدائي سأل أحد الطلاب : طير بيتكلم و أول حرف منه الباء ؟

فرد عليه الطالب وبسرعه : الببغاء

فقال : ممتاز . اسمك اية؟

فرد : أحمد

سأله المدرس: أبوك بيشتغل اية؟

رد الطالب : دكتور

فقال المدرس : شايفين ولاد الدكاتره ؟

راح المدرس سأل سؤال ثاني : حيوان بطيء و أول حرف في اسمه السين ؟

فرد أحد الطلاب : سلحفاة

يرد المدرس : ممتاز .. اسمك أية؟

فقال : وائل

المدرس : و الوالد بيشتغل اية؟

رد الطالب : مهندس

قال المدرس : شايفين ولاد المهندسين

بعدها سأل المدرس السؤال الثالث : طائر له جناحين ... ما هو ؟

فرد أحد الطلاب و بسرعه : تمساح

فيقول المدرس : أيه الغباء ده ، اسمك أية يا غبي؟

رد الطالب : عادل يا أستاذ !

المدرس : أبوك يشتغل أية يا غبي ؟

الطالب : لواء امن دولة

المدرس بص شوية حواليه و بعد كده ابتسم للطالب و قاله : بص يا حبيبي هو التمساح بيطير بس مش كتير و لو شد حيله حيطير أعلى ... و أبقى سلملي على بابا !

دول اللي افتكرتهم بس الواد قال يجي 100 نكتة ده غير اللي أنضموا لينا كل واحد فيهم كان ليه نصيب ... كل سنة و انتم طيبين و عيد سعيد و أبن نكتة