1 نوفمبر، 2010

تنظيم القاعدة بيقتل 37 مسيحي عراقي علشان كامليا المصرية !!

 

بن لادن

الظاهر أن مقولة أن "الغباء موهبة نادرة" بقت مقولة خاطئة الغباء النهاردة بقى ظاهرة كاسحة ناطحة مسطحة زى عقول أصحابها لدرجة أنهم يقتلوا الناس في العراق علشان موضوع تاني في مصر ... عجبت لك يا زمن !

قعدت ساعة و نص على النت أجري ما بين المنتديات السلفية و مواقعهم اشوف ردود الفعل على الخبر ده ... لقيت شيء غريب في كل المنتديات و المواقع ...لا يوجد أي تعليق عليه كأنه غير موجود و المرة الوحيدة اللي لقيت الخبر موجود في أحد المنتديات مشرفين المنتدى أغلقوا الموضوع و بعد شوية لقيته أتحذف ... تجاهل غريب !!

طبعا معروف أن تنظيم القاعدة و تنظيم دولة العراق الإسلامية بانتمائهم للفكر الوهابي السلفي ، و طبعا الحادث كان من القذارة أنهم يقدروا يردوا عليه فواضح ان التعليمات وصلت ليهم تجاهلوا الحادث مش عايزين مشاكل اليومين دول كفاية اللي حصل للقنوات بتاعتنا اللي كانت راس حربة موجه لعقول الشباب ... مش ناقصة حرب جديدة.

أحمـد عز !

نيجي للحادث الثاني اللي انا شايفه على قد تفكيري المتواضع انه ما يقلش أهمية عن موضوع الكنيسة العراقية ، و هو زيادة الحد الأدنى من المرتبات ... الموضوع ده هيعمل أزمة جديدة يا جدعان .. زيادة المرتبات أو زيادة الحد الأدنى ده معناها اقتصاديا زيادة حجم التضخم مع زيادة المعروض من النقد في السوق و بالتالي هتقل القيمة الشرائية للعملة و بالتالي هتزيد الأسعار دي نظرية أقتصادية معروفة و مثبتة ... يا جماعة قبل ما طالبوا بحاجة أدرسوها الله يخليكم هتودونا في داهية إذا كنتم النهاردة زعلانين أن كيلو الطماطم بقى 6 جنيه بكرة هيبقى 50 علشان الناس اللي بتطالب زيادة المرتبات ... المفروض ترجع الدولة تمسك بأيد من حديد تاني الأسواق و تحدد نسب الربح علشان تظبط الأسعار لكن السبهللة اللي أحنا عايشين فيها دي هتودينا في داهية ... الظاهر أن الغباء بقى معدي من العراق لمصر يا قلب لا تحزن !!!

اللي جاي بقى عمر أفندي هيتباع تاني و المرة دي اللي هيشتريه أخواني أبن أخواني يعني بكرة هيتغير من محلات "عمر أفندي" لمحلات "البنا أفندي" و سلملي على الخصخصة !