19 أغسطس، 2012

أضحك علشان الصورة تطلع حلوة !!

بقالي فترة ما بكتبش حاجة معلش كنت مسافر لأن أكل العيش مر .... و ساعات بيبقى علقم كمان ... المهم أديني رجعت و صممت أني أعيد في مصر ... و أجلت السفر شهر ، طبعا في الفترة الأخيرة كنت بشوف الأوضاع من بره بشكل أوضح بصراحة الوضع مخيف و غريب و محدش يقولي بكره هيبقى أحسن ، الكل خارج مصر بيتكلم عن حاجة واحدة أن الثورة تاهت بوصول التيار الديني العنصري المسمى الأخوان للسلطة و حتى لو كان وصل بديمقراطية وأنتخابات صحيحة لكن ياريت مننساش أن "هتلر " وصل للحكم عن طريق الانتخابات و هما ما يفرقوش كثير عن هتلر نفس الأيديولوجية الفاشية العنصرية ...

في الفترة الأخيرة كثرت اللجان الاليكترونية الاخوانية ، و ياريت فضلت على قد كده لكن حتى المساجد اللي كان الواحد عارف أن الخطباء فيها معتدلين تم استبعادهم و حطوا بدلهم ناس تبعهم بتدعي ليهم في كل جمعة و بتكفر أي حد ينتقضهم او يبين عوراتهم القذرة ...

النهارده على الصبح الواحد صحي على خبر يفطس من الضحك تحويل ثلاث رؤساء تحرير لنيابة أمن الدولة و التهمة العيب في الذات الملكية ... آسف العيب في ذات الريس كأنه ملاك أو أله لا يجوز الاقتراب منه ... فكرتني لما مبارك سجن ابراهيم عيسى لما أتكلم عن احتمالية وفاة الرئيس ... واضح ان ما فيش حاجة اتغيرت غير اننا جبنا رئيس بدقن و جلابية !!

تعالوا بقى نضحك شوية على الصورة الجميلة دي علشان نتعرف أكثر على اللي مش أخوان شكلهم أيه !

أنا مش أخوان