كله في الكلتش !
- الثورة فين يا عم أحمـد
- ثورة ... ثورة ايه !
- 25 يناير يا عم
- ياه ... انت لسه فاكر ما خلاص ... هوجة و خلصت
- يا عم ده دلوقتي عاوزين يطلعونا من بيوتنا و يرمونا في الشارع بأسم العدالة الاجتماعية
- أنت بتقول أيه !
- هو أنت ما بتقراش جرايد و لا بتشوف التلفزيون
- لا أصلي مطحون طول اليوم في الشغل صبح و بعد الظهر عايز أوفر للعيال لقمة عيش بعد الحاجة ما بقت نار .. بس هما هيطرودنا أزاي من بيوتنا
- بيقولك عايزين يلغوا قانون الإيجارات القديم و يخلوها عرض و طلب
- يعني أيه !
- الأول أنت ساكن فين
- في مصر الجديدة
- بتدفع ايجار قد ايه !
- بدفع 11 جنيه بس الشقة متأجرة من أيام والدي و أنا أتجوزت فيها لان الشقق غالية نار زي ما أنت عارف
- أنسى خلاص ... أعمل حسابك لو عايز تفضل في الشقة هتدفع 2000 جنيه على الأقل
- يا راجل بطل كلام فارغ
- و الله الوزير أتكلم في الموضوع ده و عملوا حلقة في قناة كده برنامج اسمه الستات ما بيعرفوش يكدبوا على تصريحات السيد الوزير
- يا نهار مهبب ... انا كل مرتبي 1200 جنيه بالحوافز أودي العيال فين ؟!
- أقولك بيعهم و اشرب بتمانهم قزازة فنيك ما هي ثورة في الكلتش !
لو حصل ده يا عمرو يبقى قول على الثورة الله يرحمها
ردحذفأا قلت دول لو كانوا شموا ريحة مقاصل فرنسا
ردحذفكانوا أحترموا نفسهم
دة معندهمش أى احساس بأى شيىء و لا بأى حد
طب والثورة مالها هي الحكومة دي حكومة ثورة اصلا دي كلها مباركية
ردحذفللأسف يا رشا ناس كثير بتتكلم في الموضوع ده ... مش عارفين أن في أكثر من 20 مليون أسرة بيستفدوا من قانون الايجارات القديم و ده معناه تشريدهم في الشارع فجأة
ردحذفعندك حق يا رامي ... الحل هو تأميم أموال كل الفاسدين فورا
ردحذفأهلا تركيب
ردحذفالحكومة لسه بتحكم بأسم مبارك لغاية النهاردة ... ماسمعتش تهنئة من وزير في الحكومة دي بعد عودة مصانع غزل شبين و المنصورة للغزل للقطاع العام مرة تانية بعد ما ثبت الفساد في بيعهم ... كأن الحكم ما حصلش .... بكره عمال شركة غزل شبين عاملين أحتفال كبير بعودة مصانعهم للدولة ... أقصد للشعب مرة تانية و هحاول اسافر و أحضر الأحتفال دي لحظة متتنسيش