أوجه الشبه بين مبارك و ديفيد كاميرون ؟
اللي تابع أحداث لندن على شاشات البي بي سي سواء العربية أو العالمية ، هيلاقي وجه سبه كبير قوي بين ماسبيرو و البي بي سي ، الاثنين وصفوا المحتجين بالبلطجية و المشاغبين ، واحد كل همه أنه يصور النيل ، و الثاني بيصور حاجات تانية غير اللي بتحصل ، أيام المخلوع حسني ، كان عامل لجان اليكترونية بتتابع مواقع التواصل الاجتماعي و المدونات و لما زهق قطع النت و اتصالات المحمول ، أما ديفيد كاميرون فيدرس دلوقتي امكانية غلق شبكات التواصل الاجتماعي على الانترنت و وقف الرسائل النصية عبر الهواتف اثناء و صرح ان اجهزة المخابرات والشرطة تدرس اذا كان "صحيحا وممكنا" قطع الاتصال.
الموضوع ده خلى الواحد يبص للدول الأوروبية المتقدمة بنظرة مختلفة شوية ، معلش هتكلم عن نفسي ، كنت دايما ببص لأنجلترا أنها أم الديمقراطية في العالم ، و أنهم بيعالجوا المشاكل من خلال دراسة علمية و سياسية و أجتماعية يقدروا من خلالها أنهم يوصلوا لأقرب الحلول الصحيحة ، على فكرة لانه مافيش حاجة أسمها صح مطلق ده وهم ساعات بنقع فيه ...
ديفيد كاميرون وعد مجلس العموم البريطاني أنه هيستعيد السيطرة على الأمور مرة ثانية و أنه هيستخدم الرصاص المطاطي و رشاشات المياة حلاوتك يا عادلي أنت كنت في السريع على طول ...
الغريب أن كل المناقشات اللي الواحد بيتابعها سواء على البي بي سي أو العربية أو حتى الجزيرة بتوصف المحتجين بالعاصابات كأن العصابات دي أتكونت فجأة بدون سبب ، و سابوا السبب الحقيقي و هي إعلان حالة التقشف اللي أتسببت في تخفيض دعم الدولة للتعليم و الصحة و تقليل فرص الاستثمار و بالتالي فرص العمـل فزادت البطالة في وقت أرتفعت فيه معدلات التضخم بشكل كبير وصل لأكثر من 17% ، و زادت بالتبعية الأسعار و بقت الحياة شبه مستحيلة بعد ما خفضت حكومة كاميرون إعانة البطالة و بقت ما بتقضيش العيش الحاف ...
طيب نيجي بقى للأهـم اليومين اللي فاتوا ظهرت على الشبكة في الفيس بوك و التويتر دعوات لنشطاء سياسيين في أمريكا لأحتلل مبنى بورصة نيويورك ، و تبعتها دعوات تانية في امريكا لاحتلال مباني البورصات في لندن و باريس و روما ، و أن يوم 17 سبتمبر القادم هيكون بداية ثورة شعبية عالمية على النظام الرأسمالي اللي تسبب في تدمير حياة الشعوب ، و أحنا لسه الحكومة بتاعتنا بتتكلم عن السوق الحرة ... يا ترى حد فاهم حاجة !
ياراجل ؟؟؟؟؟؟ ان ما في واحد منهم شال يافطة؟ هو المطالب انك تسرق تليفزيون بلازما وايفون وملابس نيك وتسيب محلات الاكل سليمة؟ طبعا في فرق كبير دول ناس حرامية بجد ,,,ناس عرفت ان البوليس خاف يتدخل يقولو عنصري وانسحب واستغلو الحكاية ونزلو سرقو...صحيح البوليس عنصري بس الناس دي معندهاش اي انتماء للبلد اللي بتديهم معونات وفي بلدهم الاصلية بياخدو بالجزمة....
ردحذفلا يا تركيب أنت أتأثرت بالكلام اللي بيتنشره وسائل الإعلام بص للموضوع بشكل أكثر عمق
ردحذفمن شهر يناير اللي فات و ديفيد كاميرون أعلن حالة التقشف ، و ده معناه تقليل الصرف على التعليم و الصحة و الخدمات العامة ، و بالتالي بيحصل أنكماش في الاستثمار ، و ده نتج عنه التالي أن 35% من اللي أنهوا دراستهم الثانوية اصبحت فرص استكمال تعليمهم الجامعي معدومة ، التعليم الخاص زاد مصاريفه بشكل كبير و ده تسبب في أن 25% من الطلبة مقدروش يستكملوا تعليمهم و سابوا الجامعة ، لو فاكر حصلت مظاهرات في لندن في شهر مارس اللي فات بسبب التقشف ، كمان في اسبانيا ، اسعار السلع زادت بأكثر من 75% ، البطالة زادت ، مافيش استثمارات ، الضرائب على الفقراء زادت بينما على الأغنياء لم تزد ولو حتى بنسبة 1% ، الفقراء بيدفعوا ثمن أخطاء الأغنياء بعد الانهيار الاقتصادي في 2008 و اللي العالم كله بيعاني منه لغاية النهارده ، على العموم راجع بيان حزب العمال الاشتراكي الانجليزي في الرابط ده
http://www.socialistworker.co.uk/art.php?id=25645
أما أنهم ما شالوش يافطة بمطالبهم أو عملوا مظاهرات منظمة فده لأنهم مش مسيسين ، لكنها حالة غضب نتيجة لسياسات خاطئة و ضغط على ناس مالهمش ذنب في اللي بيحصل و فكان لازم يكون ده رد الفعل ، و للأسف كثير من اللي بينادوا بالرأسمالية مش حاسسين باللي ممكن يحصل و على فكرة أحنا قريبين قوي من ثورة الجياع في مصر و للأسف السياسيين بتوعنا بيتخانقوا على أوهام ، و شوية مشايخ وصف الغباء اقل شىء ممكن يتوصوفوا بيه بيجروا ورا حلم الدولة الدينية بكل ما فيها من عنصرية و قذارة و مش حاسين ان الموقف حاليا على وشك الانفجار