و بدأ الهتف الحقيقي يظهر في أسيوط
على صفحات التويتر وصلت ليا تويتاية صغيرة بتقول " هتاف أسيوط الآن: ثورتنا ثورة اشتراكية ... من أجل عدالة اجتماعية " ، البداية دايما بتيجي من خارج ميدان التحرير اللي بقى تابع مش قائد ، القيادة في الفترة الأخيرة تحولت من التحرير لميدان الأربعين في السويس و ميدان القائد إبراهيم في اسكندرية ، و النهاردة أسيوط بتفتح رؤية أكثر وضوحا و قوة أن ثورتنا ثورة اشتراكية من أجل عدالة اجتماعية ؛ في نفس الوقت ميدان التحرير كان هناك دعوة بالمطالبة بوزارة للزكاة بدعوى أن هناك عدد كبير من المتسولين في ميادين مصر و أن الزكاة ستساهم في حل مشكلة البطالة ...
الفارق كبير بين هتافات أسيوط و المطالبات الجديدة في ميدان التحرير ألأول أكثر كرامة للمواطن فهتاف ثورتنا ثورة اشتراكية هو تأكيد لمفهوم العدالة و ملكية الشعب في أمواله المنهوبة و أهمها مصانع القطاع العام فهناك أكثر من 3000 مصنع تم بيعه و هناك أكثر من 150 مصنع تم تفكيكه و ايقافه
فعودة القطاع العام مرة أخرى لحظيرة الملكية الشعبية ستساهم بشكل كبير في القضاء على نسبة كبيرة من البطالة فيمكن توفير أكثر من 2 مليون فرصة عمل ، فالمصانع التي تم إيقافها عن العمل فقط يمكن وحدها أن توفر 750,000 ألف فرصة عمل ، والثلاثة آلاف مصنع لو تم استعادتهم وتشغيلهم بكامل طاقتهم المعروفة ستوفر ما يزيد عن مليون و نص فصة عمل ... الكلام ده مش كلامي لكن كلام خبراء في الاقتصاد و الصناعة
نيجي بقى لمطالبات ميدان التحرير اللي بشوفها مش أكثر من عملية شحاتة جديدة من رجال الأعمال بس المرة دي واخدة شكل ديني ، و في نفس الوقت ما وضعتش حل حقيقي للمشكلة اللي بينادوا بحلها بشكل متواصل و دائم بدون اسلوب مد الأيادي و التسول
يا خسارة ميدان التحرير بقى متأخر قوي عن باقي الميادين
لا ميدان التحرير دايما قائد و صورته اشتهرت فى العالم كله
ردحذفالاشتراكية ارتبطت بحقبة سيئة السمعه سياسيا فالناس بتقلق منها ده لو فاهمينها اساسا
واضح من تويتر و من الكلام مع الناس ان كل يوم بيمر بيضرب فى شعبية الاخوان لانهم راهنوا على الحصان الخسران
أهلا تيرس
ردحذفبنتظر دايما تعليقاتك
في الفترة الأخيرة السويس كانت ليها الريادة سواء في المطالب أو في مقاومة كل الضغوط اللي اتعملت عليهم كل الفترة اللي فاتت
اما عن الاشتراكية لازم نكوون أكثر وعي و نعرف كويس ان اللي حصل في الستينات مالوش علاقة بالاشتراكية ، ده كان نظام حكم مش منظومة سياسية و الهتاف اللي حصل أمبارح في اسيوط بيدينا بريق أمل ان الناس بدأت تفهم
عن شعبية الأخوان حدث و لا حرج في النازل بشكل مستمر هما و التيارات الدينية و هما حاليا بيحاولوا و في دعوة لمليونية اسلامية
الزمر: 22 يوليو مليونية إسلامية
ماهو الناس اللي في التحرير من كل مصر....يعني مفيش حاجة تجمعهم الا كرههم للبطئ والتواطئ....اما عايزين ايه؟ ممكن ترسى على كيلو كباب لو مالقوش حاجة يقولها ...كتر خيرهم احسن من ناس كتير عمالين يكسرو في مجاديفهم
ردحذفأهلا تركيب
ردحذفمن رأي أن الثورة لازم هي الي تقود البلد و ننسى بقى شوية النخبة السياسيين اللي أثبتوا فشلهم و هما سبب التباطوء ، الأخوان كل همهم الوصول للكرسي مش مهم الثورة ، و مش مهم مطالب الناس و لا حتى حق الشهداء ، سويرس كل همه يحافظ على دولة رجال الأعمال ، الغزالي حرب عايش في برج عاجي لوحده مالوش دعوة بالناس حتى لما بينزل التحرير تحس أنه قرفان ، البرادعي بلاش أحسن ، المجلس العسكري أنا علقت عليه على التويتر بعد البيان الفنجري قلت ما تفرحوش فى اللى انعزل الا اما تشوفوا اللى نزل
يبقى مافيش غير الثوار و الثورة و ده الحل الوحيد قدامنا
لو الهتاف ده اتعمم يا عمرو في كل الميادين هتبقى اكبر ضربة للي عايزين يسرقوا الثورة
ردحذفأهلا رشا
ردحذفدي البداية و اليومين اللي فاتوا بدأت حملة جمع توقيعات لأستعادة القطاع العام مرة تانية و في لجان في المحافظات لتوعية الناس بالموضوع ده و هنفجرها خلال الأيام اللي جاية