26 يونيو، 2011

يا عزيزي كلهم لصوص !

 

capital

خرج علينا مصراوي النهاردة بخبر على الصبح أو بيان اصدره ملاك شركة أوليمبيك جروب ، بعد ما تم كشف فضايح البيع في خصخصة شركة ايديال المصرية ، البيان بيقول أن أوليبمبيك اشترت ايديال بمبلغ 450 مليون جنيه ، و أنهم  استثمروا حوالي 2 مليار دولار في المصانع طيب هنمشي معاكم في موضوع الـ 2 مليار اللي مش عارف جابوهم منين ، بس نيجي للأهـم
القيمة الحقيقية للشركة تزيد عن 4 مليار جنيه بأسعار سنة 1997 ليه هناخدها كده واحدة واحدة
الشركة كانت بتمتلك أرض مساحتها 181 ألف متر لو حسبنا متوسط سعر المتر في الفترة دي 1000 جنيه و ده أقل قيمة ممكن تتحسب هيبقى الأرض بس تساوي مليار و 810 مليون جنيه
نيجي للمصانع ، المخازن كان فيها أصول على حسب التقارير اللي قدمها الاستاذ زكي فرج رئيس جمعية العاملين في شركة أيديال كان فيها أصول قيمتها بتقدر بأسعار 1997 بمبلغ 506 مليون جنيه ( التقرير على فكرة صادر من الجهاز المركزي للمحاسبات )
الشركة استولت على أرض بمنطقة النزهة الجديدة مساحتها 5.3 فدان قيمتهم 320 مليون جنيه وفقا لأقل تقديرات و الأرض دي تم تخصيصها عام 1982 من قبل الدولة لبناء مساكن للعاملين بالشركة حتي جاء قرار خصخصة الشركات و خدها الباشا المستثمر فوق البيعة
نيجي للاهــم الباشا المستثمر استغنى عن أكثر من 4000 عامل و فني مدرب و اصحاب خبرة وأجبرهم على الخروج معاش مبكر
نيجي بقى للأخطــر بعد دراسة الأوراق أتضح أن الشركة لم تباع في الأساس ولكن العقـد كان حق أنتفاع فقط دون الملكية سواء في الأراضي أو المصانع أو المعارض .. ما شوفتوش وساخة أكثر من كده بعد كل ده يجي السادة أصحاب الشركة ويقولوا في البيان بتاعهم أنهم ساهموا في رفعة الاقتصاد المصري ... شوف البجاحة

المتهمين علشان نعرفهم كويس
•    كمال أحمد محمد الجنزورى رئيس مجلس الوزراء السابق ووزير التخطيط
•    عاطف محمد محمد عبيد رئيس مجلس الوزراء السابق
•    سعد الدين عبدالله عبدالقادر سلامة رئيس مجلس إدارة شركة اوليبميك جروب
•    نيازى عبدالله عبدالقادر سلام عضو مجلس إدارة الشركة و أحد الشركاء الرئيسيين
•    عبدالفتاح وعبدالقادر بيومى سلام شركاء

التهم الموجهة
أهدار أكثر من 4 مليار جنيه على الدولة ، و تسهيل الإستيلاء على أموال الغير ، تحويل أراضي الشركة للأستثمار العقاري بالمخالفة للعقود ، التسبب العمدى فى تسريح العمالة المدربة وتحويلها إلى قوى معطلة بدلا من قوى منتجة وفاعلة، أما التهمة الرابعة فكانت تسهيل الاستيلاء على أموال وممتلكات العاملين بالشركة والتى قاموا بشرائها من أموالهم مثل مصيف مرسى مطروح وشاليهات وأرض العريش وبعض الأموال المودعة داخل صناديق للخدمة الاجتماعية ، ده غير التهرب من الضرائب بتغير نشاط بعض المصانع من نشاط صناعي إلى أعمال خيرية !!!

فاكر زمان كان عندنا ثلاجة أيديال ايام ما كانت قطاع عام ، فضلت شغالة زي الحصان لغاية لما غيرناها في أواخر الثمانينات تقريبا بواحدة تانية حسب الموضة اثنين باب ، و الثلاجة القديمة على رأي الست الوالدة ألله يرحمها ، فضلت شغالة زي الفل 20 سنة عمرها ما اشتكت و لا عطلت ، و الجديدة ما أستحملتش ثلاث سنين و اتخلصنا منها و جبنا واحدة تانية و برده ما كملتش أربع سنين و جبنا واحدة ثالثة ... ده الفرق لما تكون المصانع في أيد القطاع العام و لما تروح للقطاع الخاص ... حاجة تقرف و بعد كده يبعوها بأقل من نص ثمنها ... الله يخرب بيتكم واحد واحد ياللي لسه بتدافعوا عن القطاع الخاص و قرفه