25 مايو، 2011

الجدع جدع و الجبان جبان ياله يا جدع بينا على الميدان

 

ميدان التحرير

هنزل يوم الجمعة يمكن مش كل الناس موافقة على الموضوع ده ، لكن عن نفسي هنزل لأني مش حاسس أن الثورة حققت حاجة و ان المطالب الاساسية للثورة ما اتحققتش ، و شكلها كده تاهت  ، ائتلاف الثورة نزل بيان فيه أكثر من عشرين مطلب مش مطلوب من حد أنه يوافق على كل المطالب لكن عن نفسي موافق على جزء مش قليل منها و هما الآتي

أولا : المطالب الاقتصادية :
- وضع حد ادني وأقصي للأجور
- اعادة توزيع الثروات لإنقاذ البلاد من الأزمة الاقتصادية
- التحكم في الأسعار
- فرض الضريبة التصاعدية
- محاكمة كافة رجال الأعمال الفاسدين ومصادرة أموالهم

ثانياً : المطالب السياسية :
- عودة الأمن بشكل مكثف
- تقديم مبارك للمحاكمة بتهمة الخيانة العظمى , علي اثر اعتراف المشير بإعطاء مبارك الأمر للقوات المسلحة بقتل المتظاهرين
- اشراف قضائي وحقوقي علي جهاز الأمن الوطني ومحاكمة كل الضباط المتورطين في قتل المتظاهرين وتعذيبهم
- حل المجالس المحلية .
- حل جهاز الأمن المركزي أو ادماجه في الجيش
- التأكيد علي حقوق المصريين في الخارج في الانتخابات
- محاكمة عمر سليمان لأنه كان أحد الأيادي القوية للنظام السابق في تنفيذ خطة خبيثة لضرب المقاومة الفلسطينية

ثالثاً : الحريات :
- الغاء احالة المدنيين الي قضاء عسكري .
- اعادة محاكمة كل المحكوم عليهم بأحكام عسكرية بعد تحويلها الي المحاكم المدنية
- حظر فض الاعتصامات بالقوة بشكل كامل .
- تطهير الاعلام , ليصبح اعلاماً ثوريا معبرا عن صوت الشعب وليس عن صوت الحاكم

القوى الوطنية أغلبها هينزل … شباب الوفد أعلنوا رسمي أنهم نازلين ، التجمع ، القوى اليسارية بكافة أطيافه ، الليبراليين ، لكن في المقابل الأخوان كالعادة مستنين شكل الموقف أيه و جه تصريح عصام العريان نائب رئيس حزب الحرية والعدالة ، أن مكتب إرشاد الجماعة يدرس المشاركة فيما أسماه ''جمعة الغضب القادمة موضحاً أنه سيتخذ قراره عقب اجتماعه، الأربعاء القادم.

و طبعا معاهم السلفيين ماشيين في طريقهم زي ما هو خالف تعرف و مهتمين قوي بقضية كاميليا شحاتة و مش شايفين أي حاجة تانية

على فكرة أحنا مش نازلين ضـد المجلس العسكري ، لكن نازلين لتحقيق مطالب الثورة  اللي زي ما قلت تاهت و بتوه و شكلنا هنتوه معاها