17 مايو، 2011

أحنا عايشين في حالة رخاوة غبية !

مش عارف أبدأ منين ، الحالة بقت جيم خلاص ، الوضع الاقتصادي في أحرج مرحلة ممكن تمر بيها البلد و المجلس العسكري و مجلس الوزراء مش قادر ياخد قرارات حقيقية تنقذ البلد ، كل اللي يقدروا يعملوه في الوقت ده أنهم يطلبوا قروض جديدة ، و ناس هابلة مستنية الفلوس اللي أخدها حسني و عصابته أنها ترجع تاني ، طيب لغاية لما الفلوس ما ترجع هنعمل أيه ، هنقعد نتخانق مع بعضنا مرة مسلمين و مسيحيين ،و المرة اللي جاية هتبقى اسلاميين ( سلفيين و اخوان ) مع التيارات المدنية ، و هنفضل كده نتخانق لغاية لما البلد تغرق خالص ...

egyptian_revolution

اليومين اللي فاتوا اتقابلت مع عدد من الائتلافات و اتكلمت معاهم لقيت الأغلبية وجهة نظرهم قريبة من وجهة نظري لازم نلاقي حل ، و في ناس طلبة انا ننزل الشارع تاني في مظاهرات كبيرة نصحح الوضع و نضغط على المجلس العسكري علشان نأجل الانتخابات لأن اي انتخابات في الفترة دي مش هتحل لكن هتزود المشكلة أكبر ، لازم كل القوى الوطنية تجتمع على رأي واحد الأول و بعد كده نفكر في موضوع الانتخابات لكن انتخابات وسط حالة أمنية زي الزفت ، و أختلافات فكرية كبيرة و حالة احتقان طائفي ما تنفعش بأي شكل من الاشكال ، الانتخابات اللي جاية هتبقى مجزرة و هتسيل فيها دم و هيموت ناس كثير غلابة علشان أطماع ناس تانية ...

من الأخبار الكويسة اللي سمعتها النهاردة .. رغم أن بقالي كثير ما اسمعتش أخبار حلوة ، القبض على أبو يحيى و أبو أنس و حافظ سلامة و عقبال الباقي يارب في أقرب فرصة و ياريت الناس دي تتعدم و نخلص منهم لأنهم سبب القرف اللي أحنا عايشين فيه دلوقتي و هما اللي بينسفوا الثورة من اساسها

1304973073 نيجي بقى لموضوع قطر اللي واضح ان بقى عندها طموح سياسي لكن على حساب مصر ، و كل همها أنها تحرج السياسة المصرية بأي شكل ، موضوع أمين جامعة الدول العربية و اختيار د. نبيل العربي للمنصب ده ، بصراحة فيه أهانة للدبلوماسية المصرية ، أنا كنت ضد مصطفى الفقي من البداية لكن لما ألاقي الموضوع اتحول لإذلال مصر ، لا بقى نقف هنا شوية و نفكر و لازم نعرف الحكاية مشيت أزاي ، في الاول كان في أعتراضات من قطر و السودان على مصطفى الفقي ، السودان قالت أنه قال كلمة في ندوة مش عجابهم ، و قطر استغلت رفض الثوار لمصطفى الفقي و استخبت ورا الموضوع ده و هاتك يا تصريحات ، طيب المجلس العسكري قرر بعد كده أنه يختار واحد تاني لكن قطر أشترطت و اعلنت ده على الملاء في اجتماع مندوبي الدول العربية في الجامعة بشكل مهين لمصر و قالتها مش هنسحب مرشحنا الا لما مصر ترشح شخص تاني غير مصطفى الفقي و فعلا بسبب الاوضاع الغير مستقرة قرر المجلس العسكري أنه يسحب ترشيح الفقي و يرشح نبيل العربي ، رغم أن مصطفى الفقي كان واخد موافقات من 12 دولة من 22 و كان فيه دولتين لسه ما قرروش رأيهم النهائي يعني كان هيبقى معاه أغلبية ، لكن السعودية تدخلت وقالت بلاها أنتخابات و أن الجامعة دايما بتختار الأمين بالتوافق مش بالانتخاب و ضغطوا على المجلس أنه يسحب ترشيح الفقي و يرشحوا حد تاني بداله و فعلا ده اللي حصل

من الحكاية دي نقدر نعرف حاجة صغيرة أن قطر فرضت ارادتها السياسية على مصر في اختيار أمين جامعة الدول العربية ، و على فكرة قطر مش من مصلحتها أن مصر ترجع تقود المنطقة تاني لان ده ضد طموحاتها السياسية في الفترة دي و هي عايزة تكون ليها اليد العليا في المنطقة بأي شكل من الاشكال و الفلوس بتخلي الواحد يشطح و ينطح شوية ...

كلمة اخيرة بقولها لكل مصري أتقي الله في بلدك ، سيبك من موضوع مسلمين و مسيحيين و فكر احنا بكرة هناكل منين