28 أبريل، 2011

جوجول عايزة تنافس الفيس بوك !

بما أني بقالي أسبوع مش عارف أدخل على الفيس بوك و يظهر أن الأكونت بتاعي أتسرق أو حصل فيه حاجة مش عارفها ، رغم أن أصحابي قالولي أن الأكونت ما أتغيرش فيه حاجة ، لكن بصراحة قلقان و يمكن مش مفتقده قوي لأني من البداية ما كنتش من المهوسيين بيه و بتعامل معاه بشكل عادي جدا و يمكن ما أهتمتش بيه بقوة إلا من بداية الدعوة للثورة ... المهم النهاردة الأخبار بدأت بتنتشر إن جوجول هتدخل مجال الشبكات الأجتماعية بموقع جديد سموه “Google Circles”

 

Google Circles

لكن ايه موضوع دواير الجوجول اللي أعلنوا عنها ، بالرغم أن المعلومات شحيحة جدا لكن هيبدأ تدشين الموقع خلال أيام و حسب المعلومات المتوفرة هيكون في أوائل الشهر القادم يعني بعد أيام ، و جوجول كان عندها مشروع من فترة بعتبره من أكثر المشروعات فشلا في تاريخ الانترنيت من بداية انشاءها لغاية النهاردة ، و هو مشروع Google Wave أو بالعربي موجات الجوجول ، الي تشرفت أني أكون من اوائل اللي تم تجربة المشروع ده عليهم قبل ما يتم فتحه على للجمهور ، و كان بيتم دعوة الناس ليه بدعوات خاصة إما من خلال الشركة أو من خلال بعض مستخدمي خدمات جوجول بشكل عشوائي و الظاهر طلع أسمي قدام المسئول عن المشروع فقال الواد ده غلبان و طيب نخليه يجرب معانا ، بصراحة ما طلعتش لا غلبان و لا طيب معاهم بعد استخدامي ليه لمدة ثلاثة أشهر بعت ليهم رسالة نصها تريقة على المشروع و اللي فكر فيه ، رغم أني في البداية كنت مبهور من الشرح اللي كان معمول عنه في اليوتيوب و كنت فاكر أنه هيضرب موقع الفيس بوك على عينه لكن بصراحة طلع بمبة كبيرة ...

المهم هرجع تاني لموضوع دواير الجوجول و خايف ليكون بمبة هو كمان طيب ، الأخبار بتقول أن Google Circles هتربط Google Buz و Google Wave و عدد من خدمات جوجول التانية زي المدونات بعضها ببعض ، نشوف قالوا عنها أيه في الأخبار ... هما متفقين معايا ... ليــه ! ، بعد تجربتهم الفاشلة قبل كده !!