18 أبريل، 2011

أوهام الفيس بوك و الانترنيت ... حاجة تغيظ !

أمبارح صديق على الفيس بوك حط كلمتين حلويين فيهم شوية حاجات تغيظ تحطهم مع بعض التعديلات و شوية إضافات من عندي

أولا رد على الرسالة اللي كانت شغالة لفترة من الفترات و كانت بتججن الواحد

الرسام الدنماركى لسة عايش و متحرقش

لو اشترك خمسميت مليون واحد في جروب ... برده اسرائيل مش هتخرج من فلسطين

مفيش حاجة اسمها خلى بروفيلك يشغل موسيقى

ما تصدقش اللي يقولك واحد مسيحي أتحداني اني اجمع 10 مليون مسلم خلال اسبوع ...

مش هتكسب مليون دولار ولا هتقبض 300000 دولار كل شهر من شوية ضغطات على بانرات واعلانات سخيفة !!! وان مش معنى ان نجمة داوود بتنزل مع الأوفيس يبقى اسرائيل اخترقت جهازك وهتسرق منه المعلومات النووية اللى سيادتك مخبيها

كان فيه جروب منتشر اوي عايزين 30 مليون واحد عشان نحط الفانوس علي جوجل ولما نحط الفانوس علي جوجل يعني المدفع هيضرب بدري؟

نيجي بقى للإيميلات المتخلفة عقليا خصوصا الرسائل اللي تقولك أبعت و هتكسب مليون حسنة تقولش مسابقة الشمعدان

يعنى ايه جهل ع الفيس بوك :يعنى تلاقى "خالد" كاتب نكته و حلوة و بتضحك عليها رلاغم كده محدش يعبره و لا حتى يعمله لايك .....و بعد شويه تيجي "ايمى" تكتب نفس النكته و تاخد عليها 25 كومنت و 30 لايك و 20 فريند ريكوست و 10 رسائل اعجاب بدمها الخفيف

تلاقى واحد بيقولك تحدانى يهودى انى اجمع 100 مليون مسلم كان شاف اليهودى فين و لا اللى يقولك لو بقينا مليون واحد مسلم فيه اتنين حيعلنوا اسلامهم على اساس ان مصر مفهاش اكتر من70 مليون مسلم و هوا مستني المليون دول ؟

استرجل من غير ما تشرب بيرل اصل مش ده يعني الي هيخليك راجل الاعلان دة غبي جداً لان عدد البنات اكتر من عدد الولاد في مصر و بيزيدوا يعني هييجوا في يوم من الايام محدش هيشرب بيرل

أروش حاجه إبر الإيدز اللى محطوطه فى كراسى السينمات اصلا فيروس الايدز لو فضل بره الجسم تقريبا ساعه بيموت امال ازاي كان عالابر بصراحه المفروض تتحط فعلا فى كل السينمات اللى بتعرض أفلام نادية الجندي

مافيش حاجة اسمها لو جمعنا مليون واحد هنعمل بطيخ من غير بذر

يلا قولو ورايا من قلبه وروحه مصري لو  قولتها 5 مرات هيطلع لك بكار في الحلم قولها 10 مرات و هيطلع لك بكار ومعاه حسونه في الحلم و سترى بكار بالألوان و سيأتيك كابتن ماجد و احتمال النينجا ترتلز.،أرسلت إلى شخص و اهملها فانقطعت عنه قناة سبايس تون ، شخص آخر ارسلها فرزق بشريط ميكى ماوس الأصلى ، و آخر اهملها فتحول إلى بوكيمون ، و آخر مسحها شاف النجوم فى عز الظهر احذر لقد اهملها شخص من قبلك فتحول الى ماري باي باي ... طبعا حد هيسألني مين ماري با باي .. رغم ان كل مصر عارفها بس يمكن مش عارفين شكلها على العموم الله يرحمها و دي صورتها

mary bay bay

كفاية بقى الرحمـــــــة