15 أبريل، 2011

امسك حرامي .... محمود محي الدين

 

محمود محي الدين

خبر محدش عايز ينشره مش عارف ليه ...السيد الدكتور محمود محي الدين اللي دلوقتي قاعد على كرسي مدير البنك الدولي – و طبعا كلنا عارفين أيه هو البنك الدولي – و وزير الاستثمار السابق رفض أنه يرجع لمصر لانه متهم بالفساد و طبعا السادة الأمريكان اللي بيتحكموا في البنك الدولي مش عايزين يرفدوه و سيابين حرامي قاعد على أكبر كرسي اقتصادي في العالم ...

معروف أن محمود محي الدين كان من المشاركين في كارثة بيع القطاع العام و تخريب الاقتصاد المصري ، ده خلاني أفكر قوي ليه الحكومة لغاية دلوقتي ساكته على موضوع القطاع العام تحس كده أن في ضبابية في الموضوع ، شركات زي غزل شبين و عمر أفندي و غيرها مئات من الشركات تم تدميرها تقريبا و اتباعت أجزاء كثير منها كأراضي فضاء و أترفد عدد كبير من العمال و الموظفين ، و الحكومة الجميلة قاعدة ساكتة ليه !

الغريب رجعت تاني اليومين دول نغمة رجال الأعمال و أنهم الخلاص اللي هينقذ مصر ، مش عارف يعني بعد السنين دي كلها من الفساد و السرقة و تدمير شعب مصر على ايديهم لسه ليهم عين يتكلموا .. طيب ليه دايما لما حد يجيب سيرة القطاع العام قدامهم يتخضوا و يهاجموه كأنه بيطلب منهم يوزعوا فلوسهم على الناس ... ياعم انت وهو احنا مش عايزين حاجة منكم بس عايزين مصانعنا ترجع تاني و أحنا هنبنيها بأيدينا و هنخليها أحسن مليون مرة من مصانعكم ، و هنبيع بأرخص الاسعار و برده هنكسب بس أخرجوا أنتم منها حرام عليكم

نيجي بقى للكارثة اللي هتحرق البلد قريب ... اللي أسمه أيمن الظواهري مش عاجبه الحال في مصر و خرج علينا بفيديو جديد بيقول فيه أن المجلس العسكري مش عاجبه ... انت مالك يا رخم .. يا عم خليك في أفغانستان ألعب بلي مع الامريكان و ياريت ما تفكرش في مصر تاني ...