28 مارس، 2011

ثورة انجليزية على الطريقة المصرية


Socialist Party 26 March
بسبب الاحداث اللي عمالة تجري بسرعة الصاروخ في البلد اليومين دول الواحد بقى مش عارف يتابع الأخبار في العالم .. على فكرة انجلترا فيها احتجاجات قربت تاخد شكل الثورة على جيمس كاميرون رئيس الوزراء الانجليزي اللي قرر اتخاذ قرار بالتقشف الاقتصادي و بسببه هتزد معدلات التضخم و كمان هتزيد معدلات البطالة بسبب تسريح الشركات لعدد كبير من العمال و الموظفين ...
أمبارح لأول مرة من فترة طويلة أفتح الماسينجر ، لقيت اغلب الناس اللي أعرفهم أوف لاين قلت مش مشكلة أحسن برده أنا يدوبك هقرى شوية أخبار و ادخل انام لغاية لما نط قدامي صديق انجليزي كنت أتعرفت عليه من فترة في منتدى رياضي ايام كاس العالم للقارات بعد مباراة البرازيل الشهيرة كنت ضيفته عندي و أتكلمنا كذا مرة مع بعض عن حاجت كثير منها مثلا بعد نجاح الثورة في تنحي مبارك بعتلي رسالة تهنئة جميلة جدا ... المهم و أحنا بنرغي لقيته بيسألني تفتكر هننجح أننا نخلي كاميرون يستقيل من الحكومة ... بصراحة معرفتش أرد عليه لأني مش عارف ابعاد الموضوع آخر حاجة كنت اعرفها من فترة انه أعلن سياسة التقشف و ان فيه اعتراضات لكن أكثر من كده معلوماتي شبه معدومة ، كل تركيزي كان على الحالة الغريبة اللي أحنا عايشنها اللي محدش يقدر يوصفها يا ترى دي ثورة و لا مش ثورة

صديقي ده حس أني مش فاهم حاجة ، و قعد يشرح ليا الموضوع و أنهم بقالهم اسبوع في الشارع في مظاهرات مستمرة لغاية لما كاميرون يستقيل زي ما المصريين أجبروا مبارك على الاستقالة ...

بصراحة حسيت بالفخر .. احنا بقينا مثال يحتذى بيه حتى في انجلترا ، الصديق العزيز ده قعد يوصف ليا أزاي المظاهرات بدأت بعدد بسيط متعداش كام الف لكن أمبارح خرج أكثر من نص مليون في مظاهرات ضخمة جدا و الشعب في انجلترا مصمم على تنحي كاميرون ...

طبعا ما فتنيش اساله مين اللي بيقود المظاهرات يا ترى هما الشباب و الأحزاب ، جاوبني الصديق أن الأحزاب و النقابات العمالية هما اللي بيقودوا المظاهرات و بينظموها و أن البوليس الانجليزي بيتعامل معاهم بعنف شديد و أن عدد كبير من زملائه أتصابوا و في عدد كبير تم القبض عليهم ومش عارفين مسجونين فين ، كمان شرح ليا استخدامهم لخراطيم المياه و العصى الكهربائية و الخيول لفض المظاهرات .. و هنا مقدرتش أمسك نفسي و كان هيغمى عليا من الضحك

كلمة الصديق ده عن المسجونين و مش عارفين فين ، و العصيان الكهربائية فكرتني على طول باللي بيحصل في مصر ، الظاهر الموضوع ده عالمي و أحنا مش عارفين و الا ايه ... حاجة كده ترادشن في كل الدنيا ما بتفرقش بقى دول ديمقراطية من دول عديمة الديمقراطية الطريقة واحدة

مش هطول أكثر من كده لكن هسيبكم مع فيديو أرسله ليا هذا الصديق اللي عرفت منه أنه عضو نشط في الحزب الاشتراكي الانجليزي


آه صحيح الراجل اللي بيخطب في الفيديو ده واحد من قادة الحزب الاشتراكي الانجليزي و بيشرح للناس في النص الثاني من كلامه أزاي المصريين قدروا يشيلوا مبارك من الحكم و أن الانجليز مش أقل منهم و أن عزيمتنا لازم تكون قوية للوصول إلى هدفنا … احنا مش اقل من المصريين و التوانسة
انا فخور أني مصـــــري