11 مارس، 2011

مرتضى منصور و الثــورة و حب الشهرة

 

Mourtada Mansour

مع بداية ثورة 25 يناير طلع علينا مرتضى منصور يهاجمها ووقف في ميدان مصطفى محمود بيوصف الثوار بأفظع الأوصاف ، و بعـد الثورة ما نجحت و تنحى مبارك خرج علينا مرتضى في قناة الحياة و المحور يقول أني أكثر واحد أتظلم في عهد المخلوع ، و لما أتقال أن الرئيس المخلوع هيوكله للدفاع عنه ، طلع و قال أنا هقول رأيي في مؤتمر صحفي ، و عمل مؤتمر و جاله عدد كبير من الصحفيين ، و أعلن أنه رفض يدافع عن الرئيس السابق و طلع بيان بكده ، المهم في نفس المؤتمر أعلن مرتضى عن تأسيسه لحزب جديد و الظاهر أنه مالاقاش حد يدخل الحزب ده و أختفى موضوع الحزب فجأة ، النهاردة طلع علينا في ميدان مصطفى محمود اللي معلش هسميه ميدان المخابيل ، أنه هيعمل مؤتمر صحفي ( الظاهر أن المؤتمرات الصحفية عنده عاملة زي الإدمان ) يعلن فيه ترشيحه للفريق أحمـد شفيق رئيس للجمهورية ، معلش هكرر جملة قالها عمرو أديب من يومين في البرنامج بتاعه بقى واحد ما قدرش يبقى رئيس وزراء 10 ايام هينفع يبقى رئيس جمهورية بسلطاته و بابا غنوجه ...

الراجل ده مش أكثر من مهووس بالشهرة عايز يتشعبط في أي حاجة و خلاص علشان الجرايد تكتب عنه و التلفزيون يستضيفه ... حد يقولي أمتى بقى نخلص من النوعية دي