كامليا شحاتة و الأزمة الجديدة !

 

طبعا هيجي ناس تقول ربنا يستر ، و ما تقولش كده ، لكن اللي حصل من بداية موضوع كنيسة أطفيح بحلوان ، و النار  زادت تحت الرماد و كلها شوية و تنفجر ، أمبارح المسيحيين عملوا مظاهرات في كل أنحاء القاهرة تقريبا عند التلفزيون و على طريق الاوتوستراد ، و على طريق المحور و في أماكن تانية ، لكن كان واضح أن الموضوع مش الكنيسة بس لكن الموضوع أكبر من كده حالة من الخوف و الهلع ، لما أتكلمت مع بعض المتظاهرين كلهم اجمعوا على حاجة واحدة ، عايزين يحسوا بالأمان ، الناس حاسة ان الفترة اللي جاية هيكون فيها تغيرات كثير خصوصا أنه تزامن في نفس الوقت مع حملة شملت تقريبا كل المساجد يوم الجمعة اللي فاتت ، كلها بتتكلم على حاجة واحدة الدولة الدينية ...
النهاردة الصبح كان لازم يجي دور السلفيين و الأخوان اللي أتجمعوا عند مكتب رئيس الوزراء و فجروا مرة تانية موضوع كامليا شحاتة ، و لما أتكلمت مع بعض المتظاهرين ، صحيح هما في البداية قعدوا يتكلموا عن موضوع كامليا شحاتة لكن مع مرور الوقت وزيادة عدد المتناقشين معايا تفجر موضوع الدولة الدينية و المادة الثانية من الدستور ، و ان السبب الحقيقي لتظاهرهم هو التظاهرات اللي عملها المسيحيين امبارح ، و أننا مش لازم ندي فرصة للنصارى و العلمانيين الكفرة ( على حسب قولهم ) أنهم يسيطروا على البلد لأن مصر إسلامية ...
يا ترى أحنا رايحين على فين !

كثير من الناس بدأت تنسى شعار ثورتنا " تغيير …. حرية …. عدالة اجتماعية" ، نسوا أن المسلم و المسيحي حموا بعض ايديهم في أيدين بعض في ميدان التحرير ، نسيوا شعار رائع كلنا كنا بنقوله في صوت واحد " مدنية "