19 فبراير، 2011

ثروة مبارك و الجيش

الكلام عمال يروح و يجي عن الأخ مبارك ، و انه لما كان رئيس جمهورية كان واكلها والعة ، و مرة يقولوا أن ثروته وصلت لـ 70 مليار دولار ، و مرة يقولوا لا دول حوالي 3 أو 4 مليار بس ، و فجأةى يظهر خبر نشر على صحيفة الأندبنتيت البريطانية ، انه يمتلك سبائك من الذهب الأبيض موجودة في بنوك سويسرا وصلت قيمتها لأكثر من 17 مليار ...

المهم سيبكم من الإشاعات طالما أن مافيش ورق رسمي بده ، لكن الأغرب التصريح اللي طلع بيه أحمد شفيق النهاردة أن القوات المسلحة هي المسئولة عن أي إجراء بخصوص ثروة مبارك ... بصراحة تحس كده بريحة مش حلوة في الموضوع ، واضح أن فيه صفقة تحت الترابيزة أن مبارك يتنحى و يتم التغاضي عن التحقيق في ثروته ...

طيب سيبك من الاخ مبارك ، نيجي بقى للي لابد في الذرة صفوت الشريف اللي محدش قادر يقرب منه لغاية دلوقتي هو موقفه ايه ، و أخبار قصوره اللي في الشاطئ الشمالي و 6 أكتوبر و القطامية عاملة ايه ، أبنه عامل شركة رأسمالها ملايين الجنيهات جابها منين

الثورة لازم تستمر لان الكوارث كبيرة و كل اللي ظهر مش أكثر من قمة الجبل و يمكن كمان محصلش قمته ، دي يدوبك ظلـطة صغيرة من جبل كبير واضح إننا مش هقندر نشوف آخره ...