18 ديسمبر، 2010

جمعية انصار السنة تبايع مبارك أميرا للمؤمنين !

مش ممكن ..الكلام مش عايز يطلع من كثر الضحك ، افتت جمعية اصار السنة المحمدية في البحيرة بإهدار دم دكتور البرادعي الخبر منشور على مصراوي ، على فكرة الجمعية دي من فترة كانت فعلا عاملة يافطة كبيرة كتبوا عليها أن الجمعية بتبايع الرئيس محمد حسني مبارك أميرا للمؤمنين ...
و طبعا ده جزء من الفكر السلفي و هو عدم الخروج على الحاكم ، لكن اللي بيتابع كويس ياخد باله أنه من حوالي سنة بقى في نشاط غير عادي للسلفيين على الإنترنيت على المنتديات و المدونات بصراحة كنت مستغرب ليه لكن حاليا أعتقد اني بدأت أفهم اللعبة ماشية أزاي ...
حاسس أن كان فيه صفقة كده ملعوبة تحت الترابيزة لضرب الإخوان ، المعروف أن العلاقة بين الإخوان و السلفيين مش ماشية قوي في غيرة من ناحية المشايخ الكبار السلفيين للشهرة اللي واخدها الإخوان و دي ملحوظة قوي في كلامهم و ردود أفعالهم ناحيتهم ، لكن الموضوع دلوقتي كبر قوي ، الإخوان خلاص قوتهم ضعفت مابقوش الفزاعة اللي تخوف السلطة ، فبدأت الحرب على البرادعي و الحركات الوطنية المشابهة خصوصا أن اليومين جماعة 6 إبريل عاملة استبيان لأكثر الشخصيات فساد في مصر و معروف طبعا مين الشخصية دي من غير تلميح و لا تورية أهرش راسك كده و انت هتعرفه لوحدك

الشيخ البرادعي
آه في حاجة تانية كمان من أسبوعين طلعت مجلة روز اليوسف على غلافها بصورة للبرادعي وهو لابس زي الملالي بتوع إيران ، و من المعروف كم الكراهية بين التيارات السلفية و الشيعة و يمكن تكون دي علامة لبدأ الهجوم على البرادعي
و الله العظيم مش قادر أمسك نفسي من الضحك
سلام