"أفكار حرة" ... ما بقتش حرة !

 

منذ فترة , بتابع مدونة "أفكار حرة" ، تعجبني جراءة تلك الفتاة و إصرارها على أفكارها ، لكن فجأة توقفت عن الكتابة و لم تظهر أمامي اية موضوعات جديدة لها منذ أسبوعين , و اليوم قررت زيارة المدونة لتظهر لي رسالة أعتبرها رسالة عزاء و هي " لم يتم العثور على المدونة التي كنت تبحث عنها " ، فجأة اختفت من على الفضاء السيبراني مدونة كنت أحترمها و أتابعها.

منذ شهور قامت "مباحث أمن الدولة" بزيارة سريعة لصاحبة المدونة و اتذكر أنها كتبت عن تلك الزيارة بمدونتها قائلة " بدل ما اجيب لماما هديه عيد الام جبتلها امن الدوله فى البيت " ، لكنها استمرت في الكتابة و لم تتوقف ، و منذ أسبوعين كتبت تدوينه عن حملة مدوني مصر ضـد الحرس الجامعي ، و فجأة توقفت عن الكتابة ، ثم اختفت المدونة ... فلم تعد الأفكار ... حرة

الشيء الثاني اللي خلى الأفكار الحرة مابقتش حرة ، برنامج "العاشرة مساء" في الفترة الأخيرة بصراحة بقى عامل زي مسلسلات الست كوم ... من غير طعم و لا ريحه فين "منى الشاذلي" اللي ولعت الدنيا ايام قضية "خالد سعيد" ، فين منى الشاذلي لما سافرت لندن و عملت حلقة أعتبرها تاريخية ، كانت عن الانتخابات البريطانية و نقلت لينا صورة حية ... الحلقة طبعا كان فيها إسقاط رائع على الانتخابات في مصر و الفارق بين الديمقراطية الحقيقية و الديمقراطية المزيفة ، أنتي فين يا منى و ألا برده ما بقتيش حرة ...

وحشني "عمرو أديب" رغم اني عارف أنه لا هو ثوري و لا هو هتفرق معاه حاجة في موضوع التغيير ، لكن بصراحة إعلامي محترف ، زي ما بيقولوا عارف أزاي تؤكل الكتف ، عرف إزاي يتعامل مع الكاميرا و المشاهد بحرفية عالية ، و معاه بصراحة فريق إعداد في رأي هو البطل الحقيقي لبرنامج القاهرة اليوم ... رغم كل اختلافي معاك واحشتني يا أبن العم أديب !