4 نوفمبر، 2010

يا ولاد بلادنا يوم الخميس ... هكتب كتابي و أبقى .....

Hawaii
أغنية حلوة مش عارف عمالة تلعب في ودني من الصبح .. الظاهر هعملها ... ، المهم رجعنا للحر تاني و الظاهر أن الصيف بيحبنا قوي لدرجة انه مش عايز يسيبنا شوية و لازق لزقة أمريكاني غلسة.
روحت و أكلت و ريحت و شربت الشاي التمام و اتفرجت على ماتش الزمالك و أتنكدت و اتفرجت على ماتش الأهلي و أتنكدت ... النهاردة كان المفروض اقابل واحد علشان شوية شغل بس الظاهر أنه مش بتاع شغل و مش مهتم و لا حتى أتصل يعتذر أو يأجل لكن ياله دي عادة المصريين الإلتزام و الوقت مالهمش ثمن ، و انا بلف في النت من عادتي كل فترة أعدي على شوية جرايد أجنبية منهم جريدة الـ telegraph بحس أنها جريدة محترمة و متزنة أكثر من جرايد تانية فوجئت بخبر بيتصدر الجريدة أن شركة مترو جولدن ماير بتتعرض للإفلاس ...
MGM
ياه واحدة من أهم شركات الإنتاج السينمائي في العالم بتتعرض للإفلاس رغم كل الإيرادات اللي بتحققها الأفلام اليومين دول يبقى في حاجة غلط ، ده فيلم زي Avatar مثلا التكلفة الإنتاجية وصلت لـ 460 مليون دولار متقسمة 310 مليون دولار كتكلفة إنتاجية ، و 150 مليون دولار كتكلفة إضافية علشان الخدع و الحبشتكات دي لكن الإيرادات على مستوى العالم وصلت لـ 2 مليار و 740 مليون دولار ، صحيح الفيلم مش أنتاج MGM لكن السينما بتكسب بشكل خرافي على مستوى العالم كله ، بصراحة شىء محزن جدا فحجم الديون على الشركة و صل لـ 3.7 مليار دولار ... بصراحة ارقام مفزعة ليها دلالات كثير مش وقتها ...
90 سنة ده عمر شركة MGM شوفنا ليها كإنتاج سينمائي أكثر من 3000 فيلم سينمائي على مدى تاريخ الشركة غير أفلام الكارتون و أهمها توم و جيري ، و المسلسلات التلفزيونية ، و في الرابط هتلاقي قائمة بكل أفلام الشركة على موقع IMDB
من المتوقع كالعادة هتدخل إحدى الشركات اليابانية لشراء الشركة زي ما حصل في شركات تانية منها شركة Warner Bros إللي اشترتها شركة Sony
يا ترى في شركة يابانية كبيرة ممكن تيجي و تشتري شركة من شركات الإنتاج المصرية !