أوباما في الباي باي
اليومين دول مولد سيدك الانتخابي ... انتخابات في أمريكا بتدور التصويت بدأ فيها قبل ما ابدء أكتب في التدوينة دي بساعات قليلة ، و انتخابات في مصر كلها كام يوم و هنبدأ نسمع صويت و صريخ و ردح و طبعا ما فيش مانع من شوية ملح و فلفل يعني شوية بلطجة و فيها أكيد خمسة ستة هيموتوا ، و يطلع علينا اسم النبي حارسه و صاينه يقول انتخابات نزيهة ، و يجي الثاني أبن الخدامة يقول سرقوني يا بيه زوروا الانتخابات ... يعني مسلسل بيتعاد في مصر كل 6 سنين و اتعودنا عليه .. لكن خلينا في اللي بيحصل النهاردة لأنه برده ممكن يؤثر علينا بشكل كبير الحزب الجمهوري ، بالإضافة لحزب آخر أكثر تطرف من الحزب الجمهوري وهو حزب الشاي و ده بعيد عن السامعين بيمثل أكثر التيارات فاشية و كرها للعرب ، و من الواضح انه في تحالف بين الحزب الجمهوري مع حزب الشاي ضد الحزب الديمقراطي بدعوى إن أوباما فشل في إخراج أمريكا من الأزمة المالية الحادة اللي بيعاني منها الاقتصاد الأمريكي ، فالبطالة و صلت لـ 9.6% لأول مرة في تاريخ أمريكا ، و بيهاجموا أوباما لأنه حث الحكومة الأمريكية على شراء أصول الرهونات الخاصة بالفقراء اللي وقعوا في فخ القروض السهلة اللي بدأتها مؤسسة ليمان برازر و اللي أعلنت افلاسها بعد الأزمة المالية المعروفة - و دي ليها حكاية تانية مش وقتها - و على حسب اقاويل السادة بتوع حزب الشاي أن ده إهدار لأموال دافعي الضرائب ناسيين أن الحكومة مطالبة بالحفاظ على شعوبها ، فالمعروف أن أكثر من 150.000 أسرة أمريكية كانت مهددة بالطرد في الشوارع بسبب أنها ما قدرتش تدفع الديون اللي عليها و هتتشرد في الشوارع.
المهم عمنا اوباما مش ساكت و بيحاول محاولة مستميتة لدفع الناس للتصويت لصالحه و أطلق حملة علشان يحث الناس على انتخاب الحزب الديمقراطي لكن للأسف أغلب أجهزة الإعلام مسيطر عليها الجمهوريين و بقى صوت الديمقراطيين مش واصل للناس و بدء أوباما و انصاره يلجؤا للإنترنيت و اي وسيلة أخرى بديلة
المهم أحنا وضعنا أيه في كل ده ، على كافة الظروف الحزب الديمقراطي أفضل للمنطقة من الحزب الجمهوري و حلافائه من حزب الشاي ، كفاية اللي عملوا "بوش" فينا ياريت العرب في أمريكا يصحوا و يتحركوا و يقفوا جنب أوباما ، اوعوا تيأسوا من استطلاعات الرأي ممكن جدا تزويرها و اللعب فيها.
وهو عمل لنا إيه أوباما؟؟؟؟؟؟؟ داه سؤال مهم ياريت تجاوبني
ردحذفحزب شاي حزب ديمقراطي حزب فاشي احنا فين من داه كله؟
هو صحيح اوباما معملش حاجه لينا وانا عن نفسى ماكنتش مستنيه منه حاجه
ردحذفبس كفايه على الاقل انه لم تعابينه مابقاش فى الجنون المتواصل علينا اللى كان ايام المجحوم
والله انا اتمنى ان العرب هناك يفكرو ويتحركو ويعملو اى حاجه
وتقديرى مش هايحصل العرب طول الوقت رد فعل مش فعل
وهانتفرج ونشوف
صباحك فل
السلام عليكم ورحمة الله وبركاته
ردحذفياأخى الفاضل ... أمريكا دولة مؤسسات .. تحكمها مؤسسات .. الدوله لها سياسة عامة محددة أى رئيس يأتى لتنفيذ الأجندة الأمريكية مهما كانت ميوله واتجاهاته وليس الأجندة الرئاسية .. أوباما لم يقدم لنا شىء ولن يقدم شىء ولم يقدم أى رئيس أمريكى فى كل تاريخ أمريكا أى تعاطف لنا ولقضايانا هذا هو الواقع الذى يجب أن يفهمه العرب .. أما نقعد ونحط إدينا على خدنا وننتظر من ده يرمى لنا شوية إهتمام.. ومن ده يرمى لنا شوية تعاطف.. هى ديه فى نظرى قلة الحيلة!!!
أما البلاد (العريقة) زى بلدنا هى اللى كل شىء فيها بيدور فى فلك القائد حتى اللى إبنه سقط فى المدرسة بيناشد الريس يحل له مشكلته ويخلى ابنه يذاكر عشان ينجح.. أرجوك بلاش نتعلق فى الحبال الدايبة
كلمات من نور ... مرحب بيك مرة ثانية
ردحذفبص يا عم كلمات ... محدش طلب من أوباما حاجة .. لأن اللي عايز حاجة لنفسه يعملها لكن ما يطلبهاش من حد .. ده اولا
ثانيا ( حزب ديمقراطي حزب شاي ) كان للتعريف مش أكثر .. و برضه على الأقل افضل من أحزاب فتاوي تحريم أكل الخيار مش كده و الا أيه !!
مارو بتفق معاكي تماما أوباما اقل جنون من اللي قبله و ده قصدي من البداية وواضح في الجزء الأخير من التدوينية لكن البعض ما بيقراش غير مقتطفات مساكي زي العسل
ردحذفأنا حرة مساء الخير
ردحذفأمريكا مش ديمقراطية قوي زي ما ناس كثير فاهمة الموضوع فيه إشكالية كثير دوري على النت على فيلم أسمه Capitalism.A.Love.Story هو فيلم تسجيلي هتفعرفي مين اللي بيحكم امريكا بالظبط ، لو عرفتي تنزليه بالكامل ممكن ابعتلك الترجمة بتاعته أنا عامل ليه ترجمة بالكامل
مرة ثانية أنا ماليش دعوة بمين يحكم امريكا أنا ببص ليها من منطلق مصالح المنطقة و مصالح البلد اللي أحنا عايشين فيها .. الديمقراطيين أكثر مرونة و ده لصالحنا ولو حتى بشكل بسيط و هيقلل من سيطرة الكيانات الرأسمالية اللي بتتحكم في العالم حاليا
ما يصعبش عليك غالي...واحد وعد وعود عايزة سوبر مان ...لو كان في مصر كان ممكن حكمنا 50 سنة كمان ...حظة وحش اتولد في بلد لاتقدس حكامها
ردحذف