16 سبتمبر، 2010

حسوا على دمكم و شغلوا مخكم يا أزهرية

كأنهم مش شايفين البلد اللي بقت قاعدة على وابور جاز منفس قرب ينفجر تطلع لينا جبهة علماء الأزهر ببيان يولعها أكثر ما هي والعة ... يا عم حسوا شوية بدل ما تهدوا الموقف ، مش عارفين أنه ممكن واحد أهبل و الا عبيط و عقله على قده ممكن ياخد الكلام ده و تاخده الغباوة ويعمله عملة منيلة و يروح فيها ناس ملهمش دعوة ، الموضوع مش هيكون قاطعوهم بس يا بتوع الأزهر الموضوع هيتطور و هيبقى دم و موت و ابقوا قابلوني ساعتها ، كل ده علشان واحدة أسلمت و الكنيسة خدتها ... ما تسلم و لا تروح في داهية هتزود ايه في الإسلام و الا هتقلل منه ، أيه اللي هتستفيده الأمة الأسلامية بجلالة قدرها من إسلامها ، لكن أني أولع في نار الفتنة بالشكل الساذج ده مصيبة يا جبهة الأزهر ... مصيــــــبة !
الحاجة التانية قبل ما أدخل أنام قلت أبص على قناة الجزيرة لقيت عمك الشيخ الظواهري طالع فارد ريشه و بيهاجم البرادعي و بيوصفه أنه مبعوث العناية الأمريكية يا عم روح أتغطى و نام بصراحة الغباء موهبة و لما الموهبة بتزيد بتبقى عبقرية و الفرق بين العبقرية والجنون شعرة و شكلك قطعت الشعرة دي
هو في أيه ! شكل كده بكرة هيبقى يوم مش طالع ليه نهار ، أنا بكتب التدوينة دي قبل ما أنام و يارب أكون نمت و اللي بشوفه و اقراه ده حـلم أو حتى كابوس مش هزعل !

علشان تكمل
خبر منيل سمعته النهاردة .... الكهرباء هتغلي 50%