24 يوليو، 2010

يا فرحة الفاشلين بيكي يا مصــر

يا فتاح يا عليم يا رزاق يا كريم ، أول خبر تقع عليه عيني على الصبح هو تخفيض الحد الأدنى للقبول بكليات الهندسة و الطب بالجامعات الخاصة ، حقيقي يا فرحة الفاشلين بيكي يا مصر ، معلش أصل أنا من جيل الثمانينات ، جيل دخل الجامعة بمجهوده مش بفلوس "بابي" اللي جابها من الخليج ، صحيح المعدلات كانت اقل بكثير ، لكن في نفس الوقت المناهج كانت أكثر دسامة ، على العكس من النهاردة ، على ايامنا الدروس مكانتش أنتشرت بالشكل المبالغ فيه ، مش هقول ماكنش فيه لا أنا واحد من اللي أخدوا دروس لكن مش في كل المواد ، مادة واحدة بس و في النصف الثاني من الدراسة للمراجعة مش أكثر.
1249803816_grande-1527965-2038673
معلش الواحد خلاص زهق من اللي بيشوفوا في البلد ، التعليم بقى طبقات ، تعليم للطالب الفقير لازم يطلع عينه و عين أهله لأنهم فقراء علشان الواد يطلع دكتور او مهندس و يمكن في الآخر يشتغل جرسون لأنه غير لائق أجتماعيا ... ياريت نفتكر مع بعض عبد الحميد شتا الطالب المصري المتفوق اللي رفضو تعينه في وزارة الخارجية لأن أهله فقراء ، ابوه فلاح ... خرسيس عايز تتطاول على اسيادك و تبقى ابن ناس ، انت مين يا ابن الـ .... و الا بلاش خلينا مؤدبين و ولاد ناس. 
الواد من كتر ما أتقهر رمى نفسه في حضن النيل وهو بيقول آه يا بلد ما تداس