ليه حكومة نظيف ريحتها نتنـــة !!
من بداية قضية خالد سعيد و الواحد مش قارد يصدق أن فيه ناس بالبشاعة دي ، في الأول قلت ان الحكومة بتحاول تنكر بس علشان تجمل ووشها العكر ، لكن لما الحكاية زادت قوي و بدءوا ينشروا أكاذيبهم مرة يقولوا أن الواد هربان من التجنيد ... طيب علاقة التجنيد أيه بالقضية ... مش عارف
و النهاردة بيقولوا أن الواد فصلوه من التجنيد علشان لقوا معاه حشيش ... ماشي مش هعترض و لا هقول أنكم كدابين رغم أنكم كدبتوا في الأول قلتوا أنه هربان من التجنيد و المفروض أني أصدقكم ... ما شي هصدقكم مفصول من التجنيد علشان لقوا معاه حشيش ... حتى لو كان مفصول من التجنيد ... ليه قتلتوه !!
ليه اتقتل يا حبيب ... ليه أتقتل بالشكل البشع ده يا نظيف .... و اللي قتلوه هتحاسبهم يا حسني و الا هتسيبهم يحتفلوا بجريمتهم زي ما أنت بتحتفل كل يوم بقتل شعب مصر
نيجي للسؤال الأهــم انت ريحتك نتنة ليه يا نظيف !!
مش هقول هنا حاجة عن حكاية الشاب اللي بتدعوه أنه هربان من التجنيد بعد ما قتلتوه بشكل بشع ، لكن هتكلم بالأرقام اللي هتقول لينا ليه انت ريحتك نتنة ، لان سياستك الاقتصادية ريحتها مش حلوة وصلت الديون لأكثر من 700 مليار جنيه ، حجم الديون المعدومة في اللي أخدها رجال الأعمال صحابك خلال فترتك الخايبة 350 مليار ، الجنيه المصري مالوش سعر الدولار بقى يساوي 6 جنيه ، الصحة مش عارف أقول أيه كفاية أننا بقينا في المركز 63 في تصنيف منظمة الصحة العالمية ، في عهدك وصل عدد قضايا الطلاق لأكثر من 25 مليون قضية ، كل سنة بيموت 7000 واحد في حوادث الطرق ... حقيقي مصر الأمن و الأمان ، زادت نسبة أطفال الشوارع ووصلت لأكثر من 250,000 طفل رقم مفزع ، نيجي بقى للمخدرات .. في عهدك يا نظيف وصل حجم إنفاق الشعب المصري على المخدرات لأكثر من 7 مليار جنية - الله يخرب بيتك – مش هتكلم عن الفساد السياسي و التزوير في الانتخابات و استخدام النفوذ في التربح و الكسب على حساب الشعب المطحون
بعـد كل ده تقتلوا الناس بعد تعذيبهم علنا في الشارع و كمان مش عايزين تقدموهم للمحاكمة
ريحتك نتنة يا نظيف ... ريحتك نتنة !
حسبنا الله ونعم الوكيل فى الحكومة واللى صنعها
ردحذفيا أبو الفوارس الحكومة بتاعتنا حكومة نتنة ريحتها وصلت لابعد مدى و الكل خلاص مش قادر يستحمل ... خلاص الحمل زاد مابقناش قادرين نشيل أكثر من كده
ردحذف