عاشت جمهورية فيرمونت المستقلة !!

طبعا اي حد هيقرا العنوان هيقول .. أيه جمهورية فيرمونت دي … أكيد بتهزر ، طيب و فين الجمهورية المزعومة دي .. في جزر الكاريبي و الا في المحيط الهادي !

هقوله وحياتك على شاطئ الأطلنطي اللي على شمال المغرب و أنت طالع ، أمشي على طول هتلاقي قدامك شوية جزر صغيرة كوبا و الدومينيك و جاميكا سيبك منهم و أطلع لفوق شوية ... هتلاقي جزيرة بيرمودا ... سيبك منها خش شمال ، هتخبط في في عمتك واشنجطن ، اطلع فوق بقى هتعدي على ماسشوتس فوقيها على طول ولاية فيرمونت مبروك أديك و صلت ... وصفة سهلة مش كده !

طبعا هتقول أيه يا عم الجنان ده دي جوة امريكا ... يعني بالفــم المليان الولايات المتحدة الأمريكية ، هقوله و أيه يعني أمريكا متشبهش و الا متشبهش !

الولاية دي تاريخها بدا من عام 1777 ، مكانش لسه في حاجة اسمها أمريكا ، كانت مستعمرة بريطانية ، و أعلنوا استقلالهم ، و لما أمريكا أخدت استقلالها عن بريطانيا ، كان في جزء من الشعب طالب بأنضمامهم لكندا ، لكن في النهاية أنضموا للولايات الأمريكية اللي أتحدت ، المهم مش هطول ، على مدار التاريخ حصلت لخبطة كثير في حكاية فيرمونت دي مرة يخلوها تبع نيويورك ، و مرة يفصلوها عنها ، لغاية لما استقروا أنها تكون تابعة لنيويورك ، لكن الشعب الفيرمونتي صمم انه يكون ليهم دستور خاص و فعلا نجحوا في ده و اعترف الكونجرس الأمريكي بدستور ولاية فيرمونت "المستقلة" ، انا حطيتها في كوتيشن لأن كلمة المستقلة تم إضافتها حديثا.

المهم مرت الأيام و السنين ، و اليومين دول ظهر مجموعة من الثوار الأحرار الفيرمونتيين و طالبوا بأستقلال جمهورية فيرمونت و رفعوا العلم بتاعهم و ده سبب التدوينة الغريبة دي ، بص على العلم و أنت تعرف !!!

free-vermont-flag1

تعليقات

  1. جبتها منين دي يا عمرو ... حركة انفصالية في أمريكا ... جديدة موت بس كوميدي ،و عاشت جمهورية فيرمونت المستقلة الحرة اللي عايزة تنفصل عن امريكا و انا مش عارف آخد الجرين كارت

    ردحذف
  2. بص على وكبيدا هتلاقيها هناك انا عرفتها و انا بتفرج على فيلم مور الأخير كان فيه حوار مع سيناتور بيمثلهم في مجلس الشيوخ و كان مكتوب تحت اسمه ممثل فيرمونت الحرة ... فقعدت أبحث لغاية لما لقيتها

    ردحذف

إرسال تعليق

المشاركات الشائعة من هذه المدونة

و رحل مفكر آخر “نصر حامد أبو زيد“

تنظيم القاعدة بيقتل 37 مسيحي عراقي علشان كامليا المصرية !!

الرأسمالية : قصة حب !