5 ديسمبر، 2008

على شرف يوم الجمعة

الرئيس الباكستاني في القاهرة سرا ... ماشي خبر ممكن يعدي ، لكن الجديد انه كان في استضافة رجل الأعمال المصري المعروف نجيب سويرس ، الخبر ده نشرته جريدة البديل و اللي فشلت في الوصول إلى الرئيس الباكستاني السابق خصوصا إن زيارته للقاهرة لم تتعدى أيام و في سرية و تحت حراسة أمنية مشددة ، شامم ريحة نتنة بالظبط زي الريحة اللي بتطلع من التلفزيون لما بحاول أتفرج على قناة ONTV المملوكة برده لسويرس


مازلنا على شرف يوم الجمعة ، موضوع قضية بنت ليلى غفران المطربة المغربية المقيمة بالقاهرة و اللي بنتها قتلت على يد شاب أول ما تشوف شكله ترفض تماما أنه هو مرتكب الجريمة نجار مسلح مدمن حسب مزاعم وزارة الداخلية ، الموضوع فيه كلام كتير قوي و ما فيش حد مصدق الكلام اللي قاله الولد المتهم بالقتل خصوصا لما طلع في التلفزيون و ظهر أنه مش عارف أي حاجة عن الشقة اللي المفروض دخلها و عمل جريمته فيها ، دي حتى أم القتيلة مش مصدقة يبقى أحنا عايزنا نصدق ... أزيك يا حبيب ، الموضوع فيه كلام كثير لكن مضطر أتوقف عن الكلام لغاية لما تبان الحقيقة كاملة , نعرف مين القاتل.


النهاردة الصبح رجعت لحلمي القديم أني أفتتح محطة راديو على الانترنيت ، وفعلا قررت التنفيذ ، وبدأت و حجزت سيرفر للبدأ و دلوقتي ببث تجريبي لكن قريبا هيكون البث لمدة ثلاث ساعات يوميا من الساعة 11 لغاية الساعة واحدة صباحا وياريت تتابعوا المدونة علشان تعرفوا آخر الأخبار

كل جمعة و أنتم طيبين