7 ديسمبر، 2008

يا رب ما تحرمنا من موهبة الغباء ... 3 مليون دولار لبناء جامع في القطب الشمالي


خبر عجيب على العربية عنوانه سعودي يتبرع بـ 3 ملايين دولار لبناء أول مسجد في القطب الشمالي ، سؤال خطر على بالي كم عدد المسلمين في القطب الشمالي حتى يتم التبرع لهم بثلاثة ملايين دولار لبناء مسجد ، و هل الكل في حاجة إلى ذلك المسجد الفخم الذي سيقام على مساحة ألف متر مربع ليستفيد منه على الأكثر عشرة أشخاص ، طيب هتبني مسجد و الله فيك الخير ما تبني مسجد في مكان مأهول و الله علشان الشهرة و غرابة المكان ... رغم أن الخبر بيقول أن الراجل اللي أتبرع بالمبلغ ده رفض ذكر أسمه لكني متأكد عند اكتمال البناء الكاميرات التلفزيونية والصحفية سوف تلتقط لحبيبنا صاحب الثلاثة مليون دولار اللي مغلباه و مش عارف يوديهم فين مئات الصور و اللقاءات الصحفية و التلفزيونية ، و طبعا الراجل هيقول كلمتين تخلي بعض السذج ينزلوا دمعتين على خدودهم و يقولوا و الله فيه الخير .. لكن اي خير ده ولمين عندك مئات الأماكن ممكن تتبرع فيها بالخير شوفوا صورة الطفل ده في الصومال .. ياترى بقاله كام يوم ما شافش شكل الأكل ... يا ترى فيه كام طفل مريض هناك محتاج مساعدة ولو حتى 10 دولار يشتروا بيها أدوية ليهم



3 مليون دولار ... يا ترى ممكن يفتحوا كام بيت لشاب عربي بيعاني لأنه مش قادر يشتري شقة يتجوز فيها .... 3 مليون دولار يا ترى كام طفل في السودان اللي بيعاني من حروب أهلية طاحنة و تسببت في تشريد الآلاف شوف الصورة دي شوف جثث الأطفال اللي ماتت من الجوع لانها مش لاقية نص دولار من الثلاثة اللي حضرتك أتبرعت بيهم ... يا أخي ربنا ما يحرمك من موهبة الغباء ... روح يا شيخ قلل الله من أمثالك

و على العكس من ذلك الموبوء بالغباء أطلق شباب مصريين حملة لتوفير 7000 خروف لفقراء مصر اللذين في حاجة إلى من يمده إليهم بعد أن رفعت الحكومة يديها و أصبحت حكومة للأغنياء تبحث في أمورهم و تحافظ على ما اكتسبوه في غفلة من الزمان كل التحية لهؤلاء الرجال الحقيقيين للذين يعملون لصالح مجتمعه و ليس بغرض الشهرة و تبذير الأموال فيما لا ينفع