ويكليكس كمان و كمان ... "الجيش مش عايز توريث"

 

نشر موقع ويكليكس وثيقة هي عبارة عن رسالة من السفارة الأمريكية بالقاهرة لوزارة الخارجية الأمريكية بتؤكد أن حسني مبارك مش قادر يقنع الجيش ان ابنه يكون يورث الرئاسة و القادة الكبار في الجيش أعلنوا أنهم مش مقتنعين بيه ، و أن من متابعة السفارة الأمريكية للشارع السياسي المصري و ردود الأفعال ، أن التوريث هيكون مشكلة و هتحصل اضطرابات كبيرة خصوصا و أن الإصلاحات الاقتصادية اللي بيقودها جمال و المجموعة الملتفة حواليه فشلت في كل خططها

و بسبب الحرب اللي بتشنها الحكومة الأمريكية و حلفائها في أوروبا بدأ العديد من المتطوعين في عمل حاجة اسمها Web Site Mirror بيتم نشرها على ويكبيديا كاملة و بيتم تحديثها يوميا يمكن زيارة الصفحة و معرفة العناوين المختلفة للموقع من هنا

من الحاجات اللي كانت جديدة من امبارح أن المحكمة اللي كانت بتنظر قضية Julian Assange قررت نشر تحديثات لحظية لأحداث المحكمة على التويتر ، و علقت على الموضوع ده جريدة الجارديان البريطانية أن قاضي المحكمة اقرت مبدأ جديد لأول مرة في تاريخ القضاء البريطاني المعروف عنه التقليدية و الصرامة في تعاملاته و هو "العدالة المفتوحة" ، القضية أمبارح شافت أكبر تجمع صحفي في تاريخ القضاء في انجلترا.

المشكلة اللي واقع فيها Assange حاليا أنه مطالب بدفع كفالة كبيرة جدا 60.000 جنيه استرليني و البنوك اللي بيتعامل معاها أوقفت حساباته الشخصية و شركة ماستر كارد أوقفت الكريديت كارد بتاعه بضغط من الحكومة الأمريكية لكن مجموعة من اصدقائه و المؤيدين ليه قدروا يجمعوا مبلغ أكبر من الكفالة تقريبا 240.000 جنيه أسترليني ، و في نفس الوقت زادت التبرعات الخاصة بالموقع ووصلت لأكثر من 900.000 يورو – جتنا نيلة في حظنا الهباب -